ايدىڭ كۇنگەي بەتىنەن سۋ تابىلدى
«ءبىز ايدىڭ كۇنگە قاراعان جاعىندا سۋدىڭ بار ەكەنىن SOFIA تەلەسكوبىنىڭ دەرەكتەرى ارقىلى تۇڭعىش رەت راستاي الامىز. ازىرگە ءبىز بۇل سۋدى قولدانا الامىز با، جوق پا، بىلمەيمىز. ارتەميدا باعدارلاماسى بويىنشا (2024 -جىلى ايعا ادام قوندىرۋ باعدارلاماسى) زەرتتەۋ جۇرگىزۋ ءۇشىن ايدان سۋ ىزدەۋ ماڭىزدى»، - دەدى اگەنتتىك باسشىسى دجيم برايدەنشتەين.
بۇرىن ايدىڭ كۇن ساۋلەسى تۇسپەيتىن جاعىنانداعى كراتەرلەردە مۇز بار دەپ بولجانعان.
Artemis باعدارلاماسى اياسىندا NASA 2024 -جىلى ايعا عارىشكەرلەردى جىبەرىپ، مۇز، سۋ قورى بولۋى مۇمكىن وڭتۇستىك پوليۋستە زەرتتەۋلەر جۇرگىزبەكشى. بۇل باعدارلامانى جۇزەگە اسىرۋ ءۇشىن NASA Space Launch System (SLS) زىمىرانى مەن وريون عارىش كەمەسىن پايدالانۋدى جوسپارلاپ وتىر. Artemis باعدارلاماسى ءۇش كەزەڭنەن تۇرادى: ءبىرىنشى، 2021 -جىلى عارىشكەرلەرسىز عارىشقا SLS ۇشىرىلادى، سودان كەيىن 2023 -جىلى عارىشكەرلەر ايدىڭ اينالاسىندا ۇشادى، 2024 -جىلى ۇشىنشى كەزەڭدە ايعا العاش بولىپ ايەل عارىشكەر قونىپ، سودان كەيىن ەر عارىشكەر بارادى.
ايتا كەتەيىك، 1970 -جىلدارى بۇرىنعى كەڭەس وداعىنا تيەسىلى زوندتا اي بەتىندەگى سۋ ىزدەرى العاش رەت تىركەلگەن. 1990 -جىلدارى NASA نىڭ كلەمەنتين زوندى ايدىڭ پوليۋستەرىنە جاقىن جەردەگى مۇز قورىن انىقتاعان. 2018 -جىلى NASA ايدا «سۋ بار» دەپ جاريالادى، ءبىراق ونىڭ مولشەرى تولىق انىقتالماعان.
2018 -جىلى جەردىڭ تابيعي سەرىگىندە مۇزدىڭ بولۋى تۋرالى دەرەكتەر NASA اەروعارىش اگەنتتىگى ازىرلەگەن مينەرال كارتەر (Moon3) مينەرالوگيا Mapper (M3) كومەگىمەن جيناقتالعان جانە «چاندرايان-1» ءۇندى جاساندى سەرىگى ارقىلى انىقتالعان. دەرەكتەردى براۋن ۋنيۆەرسيتەتى، گاۆايي ۋنيۆەرسيتەتى، بوۋلدەردەگى كولورادو ۋنيۆەرسيتەتى، كاليفورنيا ۋنيۆەرسيتەتى، دجون حوپكينس ۋنيۆەرسيتەتى عالىمدارى جانە Ames Research Center (Nasa) ساراپشىلارى تالدادى.
ايدىڭ كۇن ساۋلەلەرىنەن قورعالعان «مۇزدى تۇزاق» دەپ اتالاتىن كراتەرلەرىندە مۇز بار ەكەنىن عارىشكەرلەر بۇرىن دا بولجاعان. دەرەكتەر وربيتالىق ايدى زەرتتەيتىن عارىش اپپاراتتارىنان الىنعان ەدى. وسى سوڭعى ناتيجە دە سونى كورسەتتى. NASA سوڭعى دەرەك بۇرىنعى بولجامنىڭ راس ەكەنىن ايعاقتادى.
ساراپشىلاردىڭ پىكىرىنشە، بولاشاقتا ايعا قونىستانۋشىلار بۇل مۇز قورلارىن ءتيىمدى پايدالانۋ ءۇشىن بىرنەشە زەرتتەۋ اپپاراتىن ۇشىرىپ، ونىڭ قالىڭدىعى مەن كولەمىن انىقتاپ الۋى كەرەك.
ايدان مۇزدىڭ تابىلۋى بولاشاقتا ايعا قونىستانۋشىلار ونى اۋىز سۋ كوزى رەتىندە پايدالانادى دەگەندى بىلدىرمەيدى. بۇدان ايدىڭ بولاشاق تۇرعىندارى كۇن جۇيەسىن ودان ءارى «جاۋلاپ الۋ» ءۇشىن قولدانىلاتىن وتىن شىعارا الادى، ياعني مۇزدى ەرىتىپ ودان سۋتەگى مەن وتتەگى وندىرەدى.
massaget.kz