قاسىم- جومارت توقايەۆ اۋىل شارۋاشىلىعى ءمينيسترى ساپارحان وماروۆتى قابىلدادى

نۇر- سۇلتان. قازاقپارات - پرەزيدەنت قاسىم- جومارت توقايەۆ اۋىل شارۋاشىلىعى ءمينيسترى ساپارحان وماروۆتى قابىلدادى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

مەملەكەت باسشىسىنا ەلىمىزدەگى اگروونەركاسىپ كەشەنىنىڭ قازىرگى جاعدايى جانە بيىلعى 9 ايدىڭ ىشىندە مينيسترلىك اتقارعان جۇمىستاردىڭ قورىتىندىسى تۋرالى ەسەپ بەرىلدى.

اۋىل شارۋاشىلىعى ءمينيسترى جىل باسىنان بەرى اۋىل شارۋاشىلىعىنداعى ىشكى ءونىمنىڭ كولەمى 5 پايىزعا ارتىپ، 4,4 تريلليون تەڭگەنى قۇراعانىن، ال ازىق- تۇلىك ونىمدەرى 3,5 پايىزعا، ياعني 1,4 تريلليون تەڭگەگە دەيىن ۇلعايعانىن حابارلادى. سونداي- اق مينيستر اۋىل شارۋاشىلىعىنىڭ نەگىزگى كاپيتالىنا جانە ازىق- تۇلىك ءوندىرىسى سالاسىنا تارتىلعان ينۆەستيتسيالاردىڭ كولەمى 15 پايىزدان ارتىپ، 445 ميلليارد تەڭگەدەن اسقانىن ايتتى.

ساپارحان وماروۆ قاسىم- جومارت توقايەۆقا يمپورتتى الماستىرۋ ساياساتىن جۇزەگە اسىرۋ بارىسى تۋرالى مالىمەت بەردى. ءمينيستردىڭ ايتۋىنشا، بۇگىندە تاۋاردىڭ التى باعىتى بويىنشا يمپورتقا تاۋەلدىلىك بايقالادى. ۇكىمەت بەكىتكەن جوسپارلاردى ورىنداۋ ارقىلى ءۇش جىل ىشىندە يمپورتتى الماستىرۋ ماسەلەسىن شەشۋگە بولادى. سونىمەن قاتار پرەزيدەنتكە قۇس تۇماۋىنىڭ تارالۋىنا قاتىستى پروبلەمانىڭ شەشىلگەنى تۋرالى ايتىلدى.

مينيستر ۇسىنعان مالىمەتتەرگە سايكەس اتالعان اۋرۋدىڭ تارالۋى تولىعىمەن جويىلعان، قۇستاردىڭ ءولىم- ءجىتىمى بويىنشا تولەنەتىن وتەماقى ماسەلەسى ءتيىستى ۆەدومستۆونىڭ باقىلاۋىندا تۇر. اۋىل شارۋاشىلىعى ءمينيسترى الداعى بەس جىلدىقتا اگروونەركاسىپ كەشەنىن دامىتۋدىڭ ۇلتتىق جوسپارىن ازىرلەۋ بارىسى تۋرالى باياندادى. اتالعان جوبانى ىسكە اسىرۋ ىشكى نارىقتى الەۋمەتتىك ماڭىزى بار ازىق- تۇلىك تاۋارلارىمەن قامتاماسىز ەتۋگە مۇمكىندىك بەرەدى.

كەزدەسۋ سوڭىندا قاسىم- جومارت توقايەۆ ساپارحان وماروۆقا قايتا وڭدەلگەن ءونىم ەكسپورتىن ارتتىرۋعا، اۋىل شارۋاشىلىعىنداعى ەڭبەك ونىمدىلىگىن جوعارىلاتۋعا، ەلىمىزدىڭ شارۋالارى وندىرگەن تاۋارلار ءۇشىن جاڭادان وتكىزۋ نارىقتارىن اشۋعا جانە ۆەتەريناريا سالاسىنداعى باقىلاۋدى كۇشەيتۋگە قاتىستى ءبىرقاتار تاپسىرما بەردى.