ادەبي جۇلدە «التىن قالام» سىيلىعىنىڭ يەگەرلەرى بەلگىلى بولدى
قازاقستان باسپا ءسوز كلۋبىنىڭ مالىمەتىنشە، بيىل بۇل شارا باۋىرجان وسپانوۆ جەتەكشىلىك ەتەتىن «ZHERSU» كورپوراتسياسىنىڭ قولداۋىمەن ۇيىمداستىرىلعان.
«التىن قالام 2020» بايقاۋىنا قازاقستان، رەسەي، ۋكراينا، ا ق ش، يزرايل، بەلورۋس ەلدەرىنەن، سونىمەن قاتار بيىل تۇڭعىش رەت موڭعوليا جانە ورتالىق افريكا رەسپۋبليكاسىنان بارلىعى 408 اۆتور قاتىستى. ورتالىق افريكا رەسپۋبليكاسىنا قونىس اۋدارعان قالامگەر ەلىمىزدەن جىراقتا جۇرسە دە، تانىمال ادەبي جۇلدەدە كوپپەن بىرگە باق سىناۋعا بەل بۋعان.
ناۋرىزدىڭ 15-نەن قىركۇيەكتىڭ 15-نە دەيىن قابىلدانعان 600-گە جۋىق شىعارما بايقاۋدىڭ akalam.kz رەسمي سايتىندا جاريالانىپ، وقىرمانداردىڭ جانە قازىلاردىڭ ساراپتاۋىنان ءوتتى. «التىن قالام» ادەبي جۇلدەسىنىڭ جەڭىمپازدارىن ماراپاتتاۋ شاراسى بيىل العاش رەت جابىق ەسىك فورماتىندا ۇيىمداستىرىلىپ، سالتاناتتى جيىنعا تەك جەڭىمپازدار مەن جوبا سەرىكتەستەرى جانە ب ا ق وكىلدەرى شاقىرىلدى.
19- قازاندا جاريالانعان بايقاۋدىڭ قىسقا تىزىمىنە ءار جانر بويىنشا جەتى شىعارمادان ەنگىزىلگەن ەدى. قازىلار شەشىمىمەن سولاردىڭ ىشىندەگى ەڭ ۇزدىك ءبىر شىعارما عانا ماراپاتتالدى.
«قازاق ادەبيەتىنە قوسقان ەلەۋلى ەڭبەگى ءۇشىن» تولەن ابدىك ماراپاتتالدى. باۋىرجان وسپانوۆ تاعايىنداعان ەسەنقۇل مامانوۆ اتىنداعى باس جۇلدە - 1 ميلليون تەڭگەنى الماتىلىق زامان تولەۋوۆ جەڭىپ الدى. جازۋشىنىڭ «قاراقۋىس» رومانى «ۇزدىك قازاق رومانى» اتالىمى بويىنشا ۇزدىك دەپ تانىلدى.
تاعى ءبىر باستى سىيلىق - 000 1000 تەڭگەنى بالالار شىعارماشىلىعىنا ارنالعان «دارابوز» بايقاۋىندا وزگەدەن وزا شاپقان پاۆلودارلىق قالامگەر الپىسباي حونج يەلەندى.
«پاندەميا سالدارىنان ەلىمىزدەگى جانە الەمدەگى جاعداي كوز الدىمىزدا ءاپ- ساتتە وزگەرىپ شىعا كەلدى. قاۋىپتى ىندەتكە بايلانىستى تۋىنداعان كۇردەلى جاعدايعا قاراماستان «التىن قالام» جۇلدەسى جالعاسىن تاپقانىنا قۋانىشتىمىن. بيىلعى بايگەدە باق سىناعاندار قاتارى بىلتىرعىدان وسكەن جانە ولاردىڭ اراسىندا تانىمال اۆتورلار، قالالىق، وبلىستىق، رەسپۋبليكالىق جانە حالىقارالىق بايقاۋلاردان جۇلدە العان كاسىبي دەڭگەيى جوعارى قالامگەرلەر كوپ بولدى. ءبىر اتاپ وتەرلىگى، بيىل akalam.kz سايتىنا كىرىپ، بايقاۋعا ۇسىنىلعان شىعارمالارمەن تانىسىپ، پىكىر بىلدىرگەندەر قاراسى قالىڭ. سوڭعى ءتورت كۇندە 1 ميلليوننان اسا ادام كونكۋرستىڭ رەسمي سايتىن اشىپ وقىعان»، - دەيدى «التىن قالام» ادەبي جۇلدەسى ۇيىمداستىرۋ كوميتەتىنىڭ ديرەكتورى كەنجە جۇمان ۇلى.
ايتا كەتەيىك، «التىن قالام» ادەبي جۇلدەسى 2009 -جىلدان بەرى وتكىزىلىپ كەلەدى. بايقاۋدىڭ ەرەكشەلىگى سول - جوبا ۇيىمداستىرۋشىلارىنىڭ ادەبيەتكە قاتىسى جوق، تەك كىتاپ وقىعاندى ۇناتاتىن وقىرماندار. العاشقى كەزەڭدە شىعارمالار akalam.kz ۆەب- سايتىندا ىرىكتەلدى. ونلاين- داۋىس بەرۋ 6 اي بويى جالعاستى.
جەڭىمپازدار ءتىزىمى:
جىلدىڭ ۇزدىك پوەزياسى «سەن عانا». ماكينارا حايريم، نۇر- سۇلتان.
جىلدىڭ ۇزدىك پروزاسى «ءولىم گۇلى نەمەسە تۇرمەدەن قاشقان قازاق قىزىنىڭ كۇندەلىگى». ەرتاي ايعالي ۇلى، الماتى.
جىلدىڭ ۇزدىك ساتيراسى «ءتۇپان تالىپ قالدى» - الپىسباي حونج، پاۆلودار.
جىلدىڭ ۇزدىك كينوسسەنارييى جانە دراماتۋرگياسى «اكىم كەلە جاتىر». قۋندىق تۇمەنباي، الماتى.
جىلدىڭ ۇزدىك فانتاستيكاسى جانە دەتەكتيۆ شىعارماسى «ءومىرزايا. قايتپاس وقيعاسى». سايلاۋ تولەۋوۆ، سەمەي.
«دارابوز» بالالارعا ارنالعان ۇزدىك شىعارما «تەلقاسقا». الپىسباي حونج، پاۆلودار.
«ۇزدىك قازاق رومانى» «قاراقۋىس» رومانى. زامان تولەۋوۆ، الماتى.
اۆتور: بالنۇر قوجاگەلدى