جۇمىسپەن قامتۋدىڭ جول كارتاسى ءساتتى ىسكە اسىرىلىپ جاتقان وڭىرلەر اتالدى

نۇر-سۇلتان. قازاقپارات - ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ جۇمىسپەن قامتۋدىڭ جول كارتاسى ءساتتى ىسكە اسىرىلىپ جاتقان وڭىرلەردى اتادى، دەپ حابارلايدى قازاقپارات ءتىلشىسى.

«جۇمىسپەن قامتۋدىڭ جول كارتاسى اياسىندا 6700 الەۋمەتتىك-كوممۋنالدىق جانە ينجەنەرلىك- كولىكتىك ينفراقۇرىلىمدىق جوبالار ىسكە اسىرىلۋدا. اتالعان جوبالار حالىقتى جۇمىسپەن قامتۋمەن بىرگە ءوڭىر تۇرعىندارىنىڭ ءومىر ءسۇرۋ ساپاسىن ارتتىرۋعا باعىتتالعان كوپتەگەن الەۋمەتتىك ماسەلەلەردى شەشەدى. بۇل مىسالى ءۇش اۋىسىمدى جانە اپاتتىق جاعدايداعى مەكتەپتەر ماسەلەسى، اۋىلدا ءبىلىم الۋ مەن مەديتسينا قىزمەتتەرىنىڭ قولجەتىمدىلىگى، اۋىل تۇرعىندارى ءۇشىن تازا اۋىز سۋ جەتكىزۋ، سۋارمالى جانە جايىلىمدىق جەرلەردىڭ كولەمىن ۇلعايتۋ، اۋىلدىق ەلدى مەكەندەردى گازداندىرۋ سەكىلدى تاعى باسقا ماسەلەلەردىڭ شەشىلۋىنە مۇمكىندىك بەرەدى»، - دەدى ءبىرجان نۇرىمبەتوۆ ۇكىمەت وتىرىسىندا.

ءمينيستردىڭ ايتۋىنشا، جۇمىسپەن قامتۋدىڭ جول كارتاسى ساباقتاس سالالاردا 100 مىڭنان استام تۇراقتى جۇمىس قۇرۋعا نەگىز بولادى.

«جۇمىسپەن قامتۋدىڭ جول كارتاسى ناتيجە كورسەتۋدە. بۇگىنگى كۇنى باعدارلاما ورتاشا جالاقىسى 130 مىڭ تەڭگەنى قۇرايتىن 202 مىڭ ادامدى جۇمىسپەن قامتاماسىز ەتتى. باعدارلاماعا قاتىسۋشىلاردىڭ وتباسى مۇشەلەرىن ەسكەرە وتىرىپ، 900 مىڭعا جۋىق ادام كىرىستەرمەن قامتىلدى. وتاندىق كومپانيالار 488 ميلليارد تەڭگەلىك تاپسىرىس تۇرىندە قولداۋ الدى (114 مىڭ جۇمىس ورنىن ساقتاپ قالعان 19 مىڭ شاعىن جانە ورتا بيزنەستى قوسا العاندا)»، - دەدى ول.

ءبىرجان نۇرىمبەتوۆ وڭىرلەر بويىنشا بۇگىنگى كۇنى جوبالار جوسپارلاعان 240 مىڭ ادامنىڭ ىشىندە 202 مىڭ ادام جۇمىس قامتىلعانىن جەتكىزدى.

«جوبالار بويىنشا جۇمىسقا تارتۋدا شىعىس قازاقستان وبلىسى، شىمكەنت قالاسى، قىزىلوردا وبلىسى جانە اتىراۋ وبلىستارى كوش باستاپ تۇر. ونىڭ ىشىندە «جۇمىسپەن قامتۋ ورتالىقتارى» ارقىلى كەمىندە 50 پايىز جۇمىسسىزداردى تارتۋ تۋرالى تالاپ بارلىق وڭىردە ساقتالۋدا»، - دەدى ول.