قىرعىزستاننىڭ بۇرىنعى پرەزيدەنتى تەرگەۋ يزولياتورىندا اشتىق جاريالادى

نۇر-سۇلتان. قازاقپارات - قىرعىزستاننىڭ بۇرىنعى پرەزيدەنتى المازبەك اتامبايەۆ بىشكەكتەگى 1- تەرگەۋ يزولياتورىنا اۋىستىرىلدى، - دەپ حابارلايدى 24.kg.

ادۆوكات زامير جووشيەۆتىڭ ايتۋىنشا، بۇرىنعى مەملەكەت باسشىسى بۇرىن ءولىم جازاسىنا كەسىلگەن سوتتالۋشىلار جاتقان جەرتولەگە ورنالاستىرىلعان.

«بۇل كامەراعا بۇگىن عانا جىلۋ قوسىلدى. بولمەدە كارىز جۇيەسى جۇمىس ىستەمەيدى، ەسىكتەر ۇنەمى اشىق. المازبەك اتامبايەۆ اشتىق جاريالادى»، - دەدى زامير جووشيەۆ.

ەسكە سالايىق، اتامبايەۆ 11 جىلعا باس بوستاندىعىنان ايىرىلعان ەدى. ول قىرعىزستان ۇ ق ك تەرگەۋ يزولياتورىندا بولعان. 6- قازانعا قاراعان ءتۇنى بولعان تارتىپسىزدىكتەر كەزىندە ول بوساتىلعان. 9- قازاندا اتامبايەۆ الا-توو الاڭىنداعى ميتينگىگە قاتىسىپ، كەلەسى كۇنى تاعى دا ۇستالعان بولاتىن.