قوستانايدا ەكى ادامدى پىشاقتاپ، بىرەۋىن ولتىرگەن كۇدىكتى ۇستالدى

قوستاناي. قازاقپارات - قوستاناي قالاسىنىڭ پوليتسەيلەرى ەكى ادامدى پىشاقتاپ كەتكەن كۇدىكتىنى قولعا ءتۇسىردى، دەپ حابارلايدى قازاقپارات وبلىستىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

كۇدىكتى جەدەل-ىزدەستىرۋ شارالارىن جۇرگىزۋ كەزىندە 23- قازان كۇنى وبلىس ورتالىعىندا قولعا ءتۇستى.

بۇعان دەيىن حابارلاعانىمىزداي، قىلمىس 21- قازان كۇنى ساعات 23:00 شاماسىندا قوستاناي قالاسىنداعى ءال-فارابي كوشەسىندە بولعان. كۇدىكتى اۋلادا وتىرعان ەكى ادامدى پىشاقتاپ كەتكەن.

59 جاستاعى ارقالىق قالاسىنىڭ تۇرعىنى وقيعا ورنىندا قازا بولدى. 61 جاستاعى ەكىنشى جابىرلەنۋشى پىشاق جاراقاتىمەن اۋرۋحاناعا جەتكىزىلدى.

«28 جاستاعى قوستاناي قالاسىنىڭ تۇرعىنى جابىرلەنۋشىلەرمەن جانجالداسىپ قالعان. ارتىنشا ەكەۋىن پىشاقپەن ۇرعان. قازىرگى ۋاقىتتا اتالعان فاكتى بويىنشا ق ر ق ك 99-بابى 2-بولىگىمەن سوتقا دەيىنگى تەرگەۋ امالدارى جۇرگىزىلۋدە، كۇدىكتى ۇستالدى» دەلىنگەن پوليتسيانىڭ باسپا ءسوز حابارلاماسىندا.