حالىق كوممۋنيستەرى كاسپيدىڭ ەكولوگيالىق ماسەلەسىن كوتەردى

اقتاۋ. قازاقپارات - قازاقستاننىڭ كوممۋنيستىك حالىق پارتياسىنىڭ (ق ك ح پ) ماڭعىستاۋ وبلىسىنداعى وكىلدەرى كاسپي تەڭىزىنىڭ سولتۇستىك بولىگىنە مەملەكەتتىك تۇرعىدا كەشەندى ەكولوگيالىق مونيتورينگ جۇرگىزۋدى ۇسىنىپ وتىر، دەپ حابارلايدى قازاقپارات ءتىلشىسى.

كوممۋنيستەردىڭ مالىمەتىنشە، وسىعان دەيىن بىردە-ءبىر كەشەندى زەرتتەۋ جۇرگىزىلمەگەندىكتەن، اكۆاتورياداعى ەكولوگيالىق ماسەلەلەردىڭ نەگىزگى سەبەپتەرى ايقىندالماعان. ق ك ح پ فيليالىنىڭ مۇشەلەرى تابيعات جاناشىرلارىمەن جانە ۇكىمەتتىك ەمەس ۇيىم وكىلدەرىمەن بىرلەسىپ، قورشاعان ورتانىڭ لاستانۋى مەن ونىڭ شەشۋ جولدارىن تالقىلادى.

كاسپيگە مۇنايدىڭ توگىلۋى، قوقىسقا تولۋى جانە زاڭسىز بالىق اۋلاۋ دەرەكتەرىنىڭ كوبەيۋى تەڭىزدىڭ لاستانۋىنا اكەپ تىرەۋدە. پارتيا مۇشەلەرى اتاپ وتكەن ايماقتاعى وزەكتى ەكولوگيالىق ماسەلەنىڭ تاعى ءبىرى - اقتاۋدان 5-6 شاقىرىم جەردەگى «قوشقار اتا» قالدىقتار قويماسى.

قازىرگى تاڭدا كولدىڭ بەتىنە 30 جىل بويى ۇزدىكسىز توگىلگەن ۋلى زاتتاردىڭ سالدارىنان 105 ميلليون توننا قاتتى قالدىق جينالعان. ول اۋاعا تاراپ، جاقىن ماڭداعى تۇرعىندار مەن سوندا جايىلاتىن مالدىڭ دەنساۋلىعىنا زيان كەلتىرۋدە.

«ءۇشىنشى ماسەلە، ءبىزدىڭ قالانىڭ ىرگەسىندەگى قوشقار اتا كولى، ونىڭ رادياتسيالىق سەبەپتەرى جانە قازىر 1989-جىلدان بەرى توقتاپ تۇرعان ح گ م ز سياقتى زاۋىتتاردىڭ اعىندى سۋلارى كولگە تۇسپەسە دە، قازىر ەكولوگيالىق پروبلەمالارى وتە ۇلكەن قاۋىپ توندىرۋدە. جالپى تۇرعىندارعا، قورشاعان ورتاعا قاۋپى وتە وراسان. وسى ماسەلەلەردى تالقىلاپ، ءوزىمىزدىڭ حالىقتىق دەپۋتاتتار ارقىلى ۇكىمەتكە جەتكىزۋ نەگىزگى ماقساتىمىز»، - دەدى قازاقستان كوممۋنيستىك حالىق پارتياسى ماڭعىستاۋ وبلىستىق فيليالىنىڭ 1-حاتشىسى روزا ماحامبەتوۆا.