شىعىس قازاقستاندىقتار الەۋمەتتىك جەلىدە «ماسكا تاعىڭىز» اكتسياسىن باستادى

وسكەمەن. قازاقپارات - شىعىس قازاقستان وبلىسىنىڭ تۇرعىندارى كوروناۆيرۋس جۇقتىرعاندار سانىنىڭ كوبەيىپ كەلە جاتقانىنا بايلانىستى حالىقتى ماسكا كيۋگە شاقىراتىن چەللەندج ۇيىمداستىردى، دەپ حابارلايدى قازاقپارات ءتىلشىسى.

چەللەندجگە قاتىسۋعا نيەت بىلدىرگەندەر الەۋمەتتىك جەلىلەردەگى جەكە پاراقشالارىندا Stories سالىپ نەمەسە ءوز ومىرىنەن مىسالدار كەلتىرىپ، حەشتەگپەن پوست جازۋدا. ءاربىر جاريالانعان جازبا - جەكە ادامنىڭ تاريحى. بىرەۋ ءوز تاجىريبەسىن بولىسسە، ەندى ءبىرى كورگەن جانە ەستىگەن وقيعالارىن ايتادى. كوبىنىڭ تاۋەكەل توبىنا جاتاتىن ەگدە جاستاعى اتا- اناسى، كىشكەنتاي بالالارى بار.

«ۇيدەن شىقپاس بۇرىن مىندەتتى تۇردە وزىمە جانە بالاما ماسكا تاعامىن. كۇز كەزىندە ادامدار اۋرۋعا ءجيى شالدىعادى. ەگەر اركىم ءوز دەنساۋلىعىنا جاۋاپكەرشىلىكپەن قارايتىن بولسا، بۇل ىندەتتى وڭاي ەڭسەرەمىز. دوستارىم مەن تانىستارىم مۇنىڭ قانشالىقتى ماڭىزدى ەكەنىن كورىپ، ويلانسىن دەگەن نيەتپەن چەللەندجدى قولدايمىن. ماسكا كيىڭىز! قولىڭىزدى ءجيى جۋىڭىز! انتيسەپتيك قولدانىڭىز!» - دەيدى وسكەمەن قالاسىنىڭ تۇرعىنى ەلەنا.

كوروناۆيرۋس ينفەكتسياسىنىڭ ەكىنشى تولقىنى بۇگىندە كوپتەگەن ەلدەردە باستالىپ تا كەتتى. مىسالى، كورشىلەس رەسەيدە اۋىرعانداردىڭ سانى قازىردىڭ وزىندە قايتادان جۇزدەگەن مىڭعا جەتىپ وتىر. ايماق بيلىگى اۋرۋحانالارداعى ورىن جەتىسپەۋشىلىگىنىڭ تۋىنداۋىنا جول بەرمەۋ، بارلىق قاجەتتى زەرتتەۋلەردى ۋاقتىلى جۇرگىزۋ ءۇشىن قولدان كەلگەننىڭ ءبارىن جاساۋدا. الايدا، ءوز دەنساۋلىعىمىز ءۇشىن جاۋاپكەرشىلىك ءارقايسىمىزدىڭ ءوز موينىمىزدا ەكەنىن ۇمىتپاعانىمىز ءجون.

«مۇنى چەللەندج قاتىسۋشىلارى دا جاقسى ءتۇسىنىپ، قولداپ وتىر. سانيتارلىق نورمالار مەن الەۋمەتتىك قاشىقتىقتى ساقتاۋ جانە ماسكا كيۋ - بۇل كوروناۆيرۋس ينفەكتسياسىمەن قاتار ماۋسىمدىق تۇماۋدىڭ دا الدىن- الۋدىڭ ەڭ ءتيىمدى ءتاسىلى. بەلسەندى شىعىسقازاقستاندىقتار ماسكا كيىپ، جاقىندارىڭىزعا قامقورلىق جاساۋعا شاقىرادى» ، - دەلىنگەن ش ق و اقپارات ورتالىعىنىڭ مالىمەتىندە.