بالقاش قالاسىندا كاسىپكەر كوپبالالى جەسىر ايەلگە پاتەر سىيلادى
بيزنەسمەن سول شاعىن اۋداندا جىلۋ ماگيسترالىنىڭ قۇرىلىسىن جۇرگىزۋدە، دەپ حابارلايدى قازاقپارات ءتىلشىسى.
دارينا قاعادەيەۆا اكىممەن تىكەلەي ەفير كەزىندە ءوزىنىڭ اۋىر جاعدايى تۋرالى ايتىپ بەردى. وراز تاۋىربەكوۆ جەسىرگە كومەكتەسۋگە دايىن دەمەۋشى تاپقان. كىلتتى تابىستاۋ ءراسىمى كوپ بالالى انا وبلىستىق پەرزەنتحانادان شىققان بەتتە ۇيىمداستىرىلدى. ايەلدىڭ بوسانۋى قيىن ءوتتى. دارينانىڭ قىزى ءبىر اپتا بويى ءومىر ءۇشىن كۇرەسىپ، جانساقتاۋ بولىمىندە جاتتى. وتباسىندا جارقىن كۇندەر باستالعانىنىڭ بەلگىسى رەتىندە نارەستەگە ەلينا («جارقىن» ) دەگەن ات قويىلدى. جاڭا قونىس تويىمەن وتباسىن بالقاش قالاسىنىڭ اكىمى وراز تاۋىربەكوۆ قۇتتىقتادى:
«ءسىزدىڭ ۇيىڭىزدە مولشىلىق، جايلىلىق، ءاردايىم جىلىلىق، جارىق بولسىن دەپ تىلەيمىن»، - دەدى شاھار باسشىسى.
بالقاش تۇرعىنى دارينا قاعادەيەۆا جۇكتىلىگىنىڭ بەسىنشى ايىندا كۇيەۋى قايتىس بولعان. ءۇش ۇلدىڭ اناسى قولداۋسىز قالىپ، جالداپ تۇرعان ءۇيىنىڭ اقىسىن تولەي الماعان. ءتورت اي بويى ايەلگە ەرىكتىلەر كومەكتەسكەن. ولار بىردەن قاراجات جيناۋ اكتسياسىن جاريالاعان بولاتىن. وكىنىشكە وراي، جينالعان سوما تۇرعىن ءۇي ساتىپ الۋعا جەتپەدى. كوپبالالى وتباسى جەرگىلىكتى بيزنەسمەننىڭ ارقاسىندا باسپانالى بولدى. قاجەتتى جيھاز جانە تۇرمىستىق تەحنيكا جاناشىر بالقاشتىقتاردىڭ كۇشىمەن جينالعان قاجاتقا الىندى. جينالعان اقشانىڭ ءبىر بولىگى جاس انانىڭ نەسيەسىن جابۋعا جۇمسالدى.
«ۆاننا، كىر جۋعىش ماشينا، پەش، پاتەردەگى بارلىق نارسە - جۇرەگى كەڭ، جاناشىر جانداردىڭ كومەگىنىڭ ارقاسى. ءار تۇرعىن ءوز ۇلەسىن قوستى. بالاعا ارنالعان توسەك تە - قالالىقتاردىڭ سىيى. مۇندا وتباسى جاقسى جانە جايلى ءومىر سۇرەدى دەپ ۇمىتتەنەمىز»، - دەيدى ەرىكتى انار ادامبەكوۆا.
