پاندەميا اسەرى: قازاقستان قانداي ونىمدەردىڭ ەكسپورتىن ازايتتى

نۇر-سۇلتان. قازاقپارات - ساۋدا جانە ينتەگراتسيا ءمينيسترى باقىت سۇلتانوۆ پاندەميانىڭ سالدارى قازاقستاننىڭ ەكسپورتتىق الەۋەتىنە قالاي اسەر ەتكەنىن ايتىپ بەردى، دەپ حابارلايدى قازاقپارات ءتىلشىسى.

«مەملەكەت باسشىسى جولداۋىندا شيكىزاتتىق ەمەس ەكسپورتتى ۇلعايتۋ تۋرالى تاپسىرما بەرگەن بولاتىن. ونىڭ جارتىسىنا جۋىعى (%42) قازىر جوعارى جانە ورتاشا وڭدەۋ ساتىسىنداعى ونىمدەردەن تۇرادى. ونىڭ كولەمى تۇراقتى تۇردە ۇلعايىپ كەلەدى. وڭدەلگەن ەكسپورتتىڭ نەگىزگى تاۋارلارى - مىس جانە مىستان جاسالعان كاتودتار، فەرروقورىتپالارى، ۋران، مۇناي وڭدەۋ ءونىمى جانە باسقالار»، - دەدى باقىت سۇلتانوۆ و ك ق-دا وتكەن باسپا ءسوز ءماسليحاتىندا.

ءمينيستردىڭ ايتۋىنشا، الەمدە پاندەميا سالدارىنان شىققان ساۋدا- ەكونوميكالىق وزگەرىستەر ءبىر جاعىنان تاۋەكەلدەردى تۋىنداتسا، ەكىنشى جاعىنان وتاندىق كاسىپورىنداردىڭ ەڭ جوعارى قوسىلعان قۇنى بار ءونىمدى وندىرۋگە كوشۋىنە «مۇمكىندىك تەرەزەسىن» اشادى.

«وسى جىلى پاندەميا اسەرىنەن وتاندىق ءونىمدى ءداستۇرلى ساتىپ الۋشىلاردىڭ ءبىرقاتارى ءوزىنىڭ ءوندىرىس كولەمىن قىسقارتىپ، قازاقستاندىق ءونىمدى ساتىپ الۋدى باسەڭدەتتى. 8-ايدىڭ قورىتىندىسى بويىنشا وڭدەلگەن تاۋارلاردىڭ ەكسپورتى %7,3 كە - 10,4 تەن 9,7 ميلليارد ا ق ش دوللارىنا دەيىن ازايدى.

ەكسپورتتىڭ نەگىزگى تومەندەۋى مۇناي ونىمدەرىنىڭ (-332,6 ميلليون $)، فەرروقورىتپالارىنىڭ (-249,7 ميلليون $)، مىرىشتىڭ (-121,2 ميلليون $) جەتكىزىلىمىنىڭ قىسقارۋى جانە باعالاردىڭ تومەندەۋى ەسەبىنەن بولىپ وتىر»، - دەيدى ول. الايدا مينيستر تاماق ونەركاسىبىنىڭ ەكسپورتى كوبەيىپ، ۇن، كۇنباعىس مايى، ماكارون ونىمدەرى، سيىر ەتى، سويا مايىنا سۇرانىستىڭ ارتقانىن ايتادى.

اۆتور: ايان بەكەن ۇلى