قاراعاندىدا ءۇش جاس ءوسپىرىم سينتەتيكالىق ەسىرتكى جاسايتىن زەرتحانا اشقان

نۇر-سۇلتان. قازاقپارات - قاراعاندىدا سينتەتيكالىق ەسىرتكى جاساۋمەن اينالىسقان ءۇش جاس ءوسپىرىم ۇستالدى.

بۇل تۋرالى ق ر ءى ءى م رەسمي وكىلى نۇردىلدا وراز ءمالىم ەتتى، دەپ حابارلايدى قازاقپارات ءتىلشىسى.

«قاراعاندىدا ەسىرتكى بيزنەسىمەن كۇرەس قىزمەتكەرلەرى سينتەتيكالىق ەسىرتكى دايىندايتىن زەرتحانا ۇيىمداستىرعان ءۇش جاس ءوسپىرىمدى ۇستادى. ولار بۇل ءۇشىن ارنايى پاتەر جالداعان. ءتىنتۋ بارىسىندا ارنايى قۇرىلعىلار مەن حيميالىق رەاگەنتتەر تاركىلەندى. سوتقا دەيىنگى ءىس قوزعالىپ، ءتيىستى ساراپتامالار تاعايىندالدى. ىشكى ىستەر مينيسترلىگى اتا-انالارعا بالا تاربيەسىنە كوڭىل ءبولىپ، ولاردى قاراۋسىز قالدىرماۋعا جانە مىنەز-قۇلقىن باقىلاۋعا كەڭەس بەرەدى»، - دەدى نۇردىلدا وراز الەۋمەتتىك جەلىدە وتكەن ونلاين بريفينگتە.

رەسمي وكىلدىڭ ايتۋىنشا، بۇعان دەيىن قاراعاندىدا سينتەتيكالىق ەسىرتكى ءوندىرىسىن جولعا قويعان شەتەل ازاماتى ۇستالعان. پوليتسيا ودان 750 گرام سينتەتيكا تاركىلەگەن.

ايتا كەتەيىك، ءبىر اپتادا قازاقستاندا جالپى سانى 3424 قىلمىس تىركەلدى. پوليتسەيلەردىڭ جەدەل ارەكەت ەتۋى ناتيجەسىندە 2198 قىلمىس ءىزى سۋىماي اشىلدى. ونىڭ ىشىندە 19 ادام ءولتىرۋ، 38 توناۋ جانە 513 ۇرلىق فاكتىلەرى اشكەرە بولدى.

اۆتور: ايجان سەرىكجان قىزى