ەلدەگى ەڭ تاپشى جانە سۇرانىس تومەن ماماندىقتار

نۇر-سۇلتان. قازاقپارات - ەلدەگى ەڭ تاپشى ماماندار - جول جۇمىسشىسى، كۇزەتشى، دايارشى، دانەكەرلەۋشى، اۆتوكولىك جۇرگىزۋشىسى.

زاڭگەرلەر مەن ەكونوميستەرگە سۇرانىس وتە از، دەپ حابارلايدى قازاقپارات energyprom.kz-كە سىلتەمە جاساپ.

بيىلعى جىلدىڭ ءۇشىنشى توقسانىندا ەلەكتروندى ەڭبەك بيرجاسىندا (ە ە ب) بىلىكتى جۇمىسكەرلەرگە ارنالعان 176 مىڭ بوس جۇمىس ورنى بار. بۇل وتكەن توقسانمەن سالىستىرعاندا %12,2 عا كوپ. ورنالاستىرىلعان تۇيىندەمەلەر سانى 123,1 مىڭعا جەتتى، ول ەكىنشى توقسانعا قاراعاندا %20,2 عا ارتقان.

جالپى كارانتيننىڭ ەنگىزىلۋىنە بايلانىستى شىلدە ايىندا سۇرانىس پەن ۇسىنىستىڭ تومەندەۋى بايقالدى، ءبىراق تامىز ايىندا كارانتيندىك شارالار بىرتىندەپ السىرەگەننەن كەيىن بوس جۇمىس ورىندارى مەن تۇيىندەمەلەر سانى ارتقان. ە ە ب- دا نۇر-سۇلتان، الماتى قالالارىندا جانە قاراعاندى مەن قوستاناي وبلىستارى سياقتى سولتۇستىك وڭىرلەردە بوس جۇمىس ورىندارى بەلسەندى تۇردە ورنالاستىرىلعان.

بۇل وڭىرلەردە رەسپۋبليكا بويىنشا ءۇشىنشى توقسانداعى بارلىق بوس جۇمىس ورىندارىنىڭ %45 ورنالاستىرىلدى. وسى كەزەڭدە نۇر-سۇلتان مەن باتىس وڭىرلەرىندە - ماڭعىستاۋ جانە اتىراۋ وبلىستارىندا جۇمىس ىزدەۋشىلەر تۇيىندەمەلەرىن بەلسەندى تۇردە ورنالاستىرعان.

ەلىمىزدە ەڭ كوپ سۇرانىسقا يە ماماندار — جول جۇمىسشىسى (6,8 مىڭ بوس جۇمىس ورنى)، كۇزەتشى (4,9 مىڭ بوس جۇمىس ورنى)، اۆتوموبيل جۇرگىزۋشىسى (4,3 مىڭ بوس جۇمىس ورنى)، باستاۋىش سىنىپ مۇعالىمى (3,3 مىڭ بوس جۇمىس ورنى) جانە مەدبيكە (2,9 مىڭ بوس جۇمىس ورنى).

2020-جىلدىڭ ءۇشىنشى توقسانىندا ەڭ تاپشى ماماندار - جول جۇمىسشىسى (بوس جۇمىس ورىندار سانى تۇيىندەمە سانىنان 4,8 مىڭعا اسادى)، كۇزەتشى (3,2 مىڭعا)، دايارشى (1,5 مىڭعا)، دانەكەرلەۋشى (1,5 مىڭعا) جانە اۆتوموبيل جۇرگىزۋشىسى (1,4 مىڭعا).

سونىمەن قاتار، قازاقستانداعى ەڭ قاجەت ەمەس ماماندار - زاڭگەر (جۇمىس ىزدەۋشىلەردەن تۇسكەن تۇيىندەمەلەر سانى بوس جۇمىس ورىندارىنىڭ سانىنان 1,7 مىڭعا ارتىق)، ەكونوميست (649 تۇيىندەمەگە)، ينجەنەر- پروگرامميست (642 تۇيىندەمەگە)، دەنە شىنىقتىرۋ جانە سپورت مۇعالىمى ( 617 تۇيىندەمەگە) جانە فەلدشەر (604 تۇيىندەمەگە).