كۇزگى كوروناۆيرۋس قالاي ءوتىپ جاتىر - مامانمەن سۇحبات

None
None
نۇر-سۇلتان. قازاقپارات — كوروناۆيرۋس ينفەكتسياسى مۋتاتسيا جاعدايىندا اسا جۇقپالى بولىپ، كۇردەلى اۋرۋلارعا اكەپ سوعۋى مۇمكىن.

بۇل تۋرالى نۇر-سۇلتان قالاسىنىڭ 11№ قالالىق ەمحاناسىنىڭ ينفەكتسيونيست دارىگەرى قوڭىر مەدەتوۆا ايتىپ بەردى، دەپ حابارلايدى قازاقپارات ءتىلشىسى.

- حالىقتى كوروناۆيرۋستىڭ جاڭا تولقىنى بولۋى مۇمكىن دەگەن سۇراق مازالايدى. ينفەكتسيونيست رەتىندە بۇل تولقىننىڭ قانشالىقتى مۇمكىن ەكەنىن جانە قالاي قورعانۋ قاجەتتىگىن ايتىپ بەرسەڭىز؟

- قازىرگى ۋاقىتتا ادامدار ەپيدەمياعا قارسى شارالاردى ۇستانباسا، ارا قاشىقتىقتى ساقتاماسا، كوروناۆيرۋس ينفەكتسياسىنىڭ ەكىنشى تولقىنى بولۋى ىقتيمال. ويتكەنى، ۆيرۋس ەشقايدا كەتپەيدى، ول ءالى دە وسىندا. ال ودان ءوزىڭىزدى قورعاپ، وزگە ادامدارعا جۇقتىرماۋ ءۇشىن قول گيگيەناسىن ساقتاپ، توپ ىشىندە ماسكا تاعىپ، تۇشكىرىپ-جوتەلگەن ادامداردان الشاق ءجۇرۋ كەرەك.

- ەگەر ادام ءوزىن جايسىز سەزىنسە، ەڭ الدىمەن نە ىستەۋگە كەڭەس بەرەر ەدىڭىز؟

- ەگەر ادام سىرقاتتانىپ قالسا، ۇيدە قالىپ، وقشاۋلانۋعا جانە ۇيدەگىلەردىڭ حال-جاعدايىن باقىلاۋعا كەڭەس بەرەمىن. وسىلايشا ءسىز ءوزىڭىزدى قورعاپ، ۆيرۋستىڭ تارالۋىنىڭ الدىن الاسىز. دەنە تەمپەراتۋراسىنىڭ پايدا بولسا، جوتەل مەن ەنتىگۋ بايقالسا - ۋچاسكەلىك دارىگەرگە جۇگىنىپ، مەديتسينالىق كومەك الۋ كەرەك جانە ءوز سيمپتومدارىڭىز تۋرالى حابارلاۋ قاجەت. ۋچاسكەلىك دارىگەر ءسىزدىڭ جاعدايىڭىزدى باقىلاپ، ناشارلاعان جاعدايدا اۋرۋحاناعا جاتقىزا الادى.

- كوروناۆيرۋستىڭ مۋتاتسيالانۋى مۇمكىن بە جانە ونىڭ سالدارى قانداي بولماق؟

- بۇل كوروناۆيرۋستىڭ مۋتاتسيالىق قاسيەتتەرى بار. ءبىراق ءبىز جاڭا ۆيرۋستىڭ قالاي ارەكەت ەتەتىنىن، مۋتاتسياعا ءتۇسۋ-تۇسپەۋىن بىلمەيمىز. مۋتاتسيا جاعدايىندا ول اناعۇرلىم جۇقپالى بولىپ، دەنساۋلىق ءۇشىن اۋىر سالدار اكەلۋى مۇمكىن.

- كۇزگى نەمەسە قىسقى كوروناۆيرۋستىڭ جازعى تۇرىنەن ايىرماشىلىعى بار ما؟

- ازىرگە COVID-19 اۋرۋىن تۋدىراتىن كوروناۆيرۋستىڭ ماۋسىمدىق سيپاتى راستالعان جوق. بالكىم، قىس مەزگىلىندە تۇماۋدىڭ ماۋسىمدىق ءورشۋى كوروناۆيرۋستىڭ قارقىندى تارالۋىمەن سايكەس كەلەتىن شىعار. كۇزگى نەمەسە قىسقى كوروناۆيرۋس كلينيكالىق بەلگىلەرى بويىنشا جازدان ەش ايىرماشىلىعى جوق.

- سۋىق كۇندەر باستالعان سوڭ كوروناۆيرۋسپەن سىرقاتتانۋ احۋالى قانداي؟ ادامدار نەنى ءبىلۋى كەرەك؟

- ءدال قازىر ۆيرۋستىڭ قىسقى سۋىقتا قالاي ارەكەت ەتەتىنى جانە كوروناۆيرۋس پنيەۆمونياسىنىڭ قالاي وتەتىنى بەلگىسىز. ءبىراق بۇل اۋرۋ سۋىققا جاۋاپ بەرىپ، اناعۇرلىم بەلسەندى بولۋى دا مۇمكىن. سوندىقتان قازاقستاندىقتار قىس مەزگىلىندە كوروناۆيرۋس ينفەكتسياسىنان قورعانۋعا بارىنشا جاۋاپكەرشىلىكپەن قاراۋى كەرەك.

قىستا يممۋنيتەتتى تومەندەتەتىن سۋىق تيۋدەن، سترەسستەن اۋلاق بولۋ ۇسىنىلادى. دۇرىس تاماقتانۋ دا اعزانىڭ يممۋندىق جۇيەسىنە كوروناۆيرۋس ينفەكتسياسىن جەڭۋگە كومەكتەسەدى.

اۆتور: ايجان سەرىكجان قىزى

سوڭعى جاڭالىقتار