+7 (701) 759 90 19
-9 °С : نۇر-سۇلتان
-1 °С : الماتى
USD 422.87 EUR 503.38
RUB 5.6 CNY 64.3
جاڭالىقتار

سوعىستا قازا تاپقان قازاقستاندىق ءۇش جاۋىنگەردىڭ سۇيەگى تۋعان ەلگە اكەلىندى

24 قازان 11:32
:ءبولىسۋ
سوعىستا قازا تاپقان قازاقستاندىق ءۇش جاۋىنگەردىڭ سۇيەگى تۋعان ەلگە اكەلىندى

نۇر-سۇلتان. قازاقپارات - ىزدەۋ توبى جۇمىسىنىڭ ناتيجەسىندە ەكىنشى دۇنيەجۇزى سوعىسىندا قازا تاپقان ءۇش قازاقستاندىقتىڭ ەسىمى بەلگىلى بولدى، دەپ حابارلايدى قازاقپارات ءتىلشىسى.

ق ر قورعانىس مينيسترلىگىنىڭ مالىمەتىنشە، ۋكرايناداعى «ۆەرتيكال» مامانداندىرىلعان بىرلەستىگى سوعىس جىلدارىندا ۋكراينا اۋماعىندا قازا تاپقان قازاقستاندىق جاۋىنگەرلەر قايىرجان تىكشەكەيەۆ، سەيد تويناشيەۆ پەن وكسىكباي بازاربايەۆتىڭ سۇيەگىن تاپتى.

نۇر-سۇلتان قالاسىنداعى قارۋلى كۇشتەردىڭ اسكەري-تاريحي مۇراجايىندا قايىرجان تىكشەكەيەۆتىڭ سۇيەگىن تۋىستارىنا تاپسىرۋ ءراسىمى ءوتتى.

التىبۇرىشتى مەدالونعا سالىنعان قاعاز توسەنىش جاۋىنگەردىڭ جەكە باسىن انىقتاۋعا مۇمكىندىك بەردى.

قايىرجان تىكشەكەيەۆ 1916-جىلى سولتۇستىك قازاقستان وبلىسى ايىرتاۋ اۋدانىندا دۇنيەگە كەلگەن. سول جەردەن ول مايدانعا اتتانىپ، 1941-جىلى كيەۆتى قورعاۋ كەزىندە قايتىس بولدى.

بارلىق اسكەري راسىمدەردى ساقتاي وتىرىپ، مايىتتەر جاۋىنگەردىڭ نەمەرەسىنە ودان ءارى قايتا جەرلەۋ ءۇشىن بەرىلدى.

«ۋكراين حالقىنا، «ۆەرتيكال» ىزدەۋشىلەرىنە، ءبىزدىڭ ەلشىلىك پەن قورعانىس مينيسترلىگىنە پاندەمياعا قاراماستان اتامنىڭ سۇيەكتەرىن جەتكىزگەنى ءۇشىن العىسىمدى بىلدىرگىم كەلەدى. جاقىندا ءبىز تۋعان جەرىمىزگە بارىپ، بارلىق راسىمدەردى ساقتاي وتىرىپ، قايتا جەرلەيمىز. ماعان الەۋمەتتىك جەلىدە حابارلاسىپ، اتامنىڭ سوڭعى رەت شايقاسقا قاتىسقان كيەۆ وبلىسى ماكاروۆ اۋدانىنىڭ بوروۆكا اۋىلىندا تابىلعانىن حابارلادى»، - دەيدى قازاقستاندىق جاۋىنگەردىڭ نەمەرەسى مارات تىكشەكەيەۆ.

ەسكە سالا كەتەيىك، ءبىز بۇعان دەيىن قايىرجان تىكشەكەيەۆتىڭ سۇيەگى 80 جىلعا جۋىق ۋاقىتتان كەيىن تابىلىپ، تۋعان ەلىندە قايتا جەرلەنەتىنىن جازعان بولاتىنبىز. ال، قازا تاپقان تاعى ءبىر جاۋىنگەر سەيد تويناشيەۆ 1922-جىلى دۇنيەگە كەلگەن. جاۋىنگەر ماڭعىستاۋ وبلىسىندا قايتا جەرلەنەدى.

قازىرگى ۋاقىتتا ۋكراينا تاراپىنان 1913-جىلى تۋعان گۆارديا اتقىشتار ۆزۆودىنىڭ كومانديرى لەيتەنانت وكسىكباي بازاربايەۆتىڭ سۇيەكتەرىن تاپسىرۋدا كومەك كورسەتۋ جۇمىستارى جۇرگىزىلۋدە.

قازاقستاندىق ىزدەۋشىلەردىڭ ىزدەۋ-ەكسپەديتسيالىق جانە مۇراعاتتىق قىزمەتى شەتەلدىك ارىپتەستەرمەن تىعىز ىنتىماقتاستىقتا جۇرگىزىلەدى. ول سۇراپىل سوعىستا قازا تاۋىپ، حابارسىز كەتكەندەردىڭ ەسىمىن ماڭگى ەستە ساقتاۋدا بىرىگۋگە سەپ بولۋدا.


:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات