تۇركىستاندا قوس عۇلاماعا ەسكەرتكىش قويىلدى

None
None
تۇركىستان. قازاقپارات - تۇركىستان قالاسىندا قازاقتىڭ ۇلى اقىنى ابايدىڭ 175 جىلدىعى مەن ۇلى ويشىل ءابۋ ناسىر ءال-فارابيدىڭ 1150 جىلدىق مەرەيتويىنا وراي ەڭسەلى ەسكەرتكىشتەر ورناتىلدى.

سالتاناتتى راسىمگە ق ر مەملەكەتتىك حاتشىسى قىرىمبەك كوشەربايەۆ، ق ر پرەمەر-ءمينيسترىنىڭ ورىنباسارى ەرالى توعجانوۆ پەن تۇركىستان وبلىسىنىڭ اكىمى ءومىرزاق شوكەيەۆ قاتىستى، دەپ حابارلايدى قازاقپارات ءتىلشىسى.

اباي قۇنانباي ۇلىنىڭ تاس ءمۇسىنى شاھارداعى «وقۋشىلار سارايى» عيماراتىنىڭ الدىنا قويىلدى. ال، الەمنىڭ ەكىنشى ۇستازى اتانعان ءابۋ ناسىر ءال-فارابيدىڭ ەسكەرتكىشى جاڭا وبلىستىق دراما تەاترى الدىنان بوي كوتەردى.

دەمەۋشىلەر ەسەبىنەن جاسالعان ەكى ەسكەرتكىشتىڭ دە اۆتورى - ءمۇسىنشى گۇلفيا مەلدەش.

ۇلتىمىزدىڭ ۇلى تۇلعالارىنىڭ مۇسىندەرى مونۋمەنتالدى ستيلدە جاسالعان. قولادان قۇيىلعان قوس ەسكەرتكىشتىڭ بيىكتىگى - 4 مەتر، سالماعى - 1,5 توننا. 3,5 مەترلىك تۇعىرعا ورناتىلعان.

ەسكەرتكىشتەردىڭ سالتاناتتى اشىلۋ راسىمىندە ءسوز العان مەملەكەتتىك حاتشى قىرىمبەك كوشەربايەۆ قاسيەتتى قالاداعى ءىس-شارانى ۇلى دالانىڭ ۇلاعاتتى تۇلعالارىنا تاعزىم ەتۋ ماقساتىندا اتقارىلىپ جاتقان يگى ىسكە بالادى.

«ەلباسى نۇرسۇلتان نازاربايەۆتىڭ باستاماسىمەن، مەملەكەت باسشىسى قاسىم-جومارت توقايەۆتىڭ قولداۋىمەن تۇركىستان دەربەس وبلىس رەتىندە وركەندەپ، تاريحي شاھار جاسارىپ، جاڭارۋدا. تۇركىستان بار قازاقتىڭ باسىن قوسىپ، ەل بولىپ ءباتۋا جاساعان تاريحي القاپ. وسى ەكى رۋحاني تۇلعاعا ارنالعان ەسكەرتكىشتەردىڭ رۋحاني استانامىز تۇركىستاندا تۇرۋى ارينە زاڭدىلىق، ارينە قاجەتتىلىك. ويتكەنى بۇل ەسكەرتكىشتەر - جاڭا تاۋەلسىزدىك زامانىندا ءبىزدىڭ رۋحاني جاڭعىرۋىمىزعا قولداۋشى ءارى كۋاگەر بولادى دەگەن ۇمىتتەن شىققان نيەت، شارا»، - دەدى مەملەكەتتىك حاتشى.

ال وبلىس اكىمى ءومىرزاق شوكەيەۆ وركەنيەت كوشىندەگى ايگىلى ويشىلداردىڭ مەرەيتويى قاتار كەلگەن بيىلعى جىلدىڭ ەلىمىز ءۇشىن ەلەۋلى جىلعا اينالۋىن اتاپ ءوتتى.

«ءبىز بۇل تويلاردى مەملەكەت باسشىسى ايتقانداي، ىسىراپشىلدىقپەن ەمەس، ىنساپ پەن ءتالىم-تاربيەنىڭ توڭىرەگىندە اتاپ وتۋدەمىز. بۇل - دۇرىس شەشىم. بيىلعى جىلدىڭ اۋىر بولعانىنا قاراماستان ءبىز ۇلت رۋحانياتىنا بەرەرى مول، رۋحاني-مادەني باعىتتاعى ءبىرشاما جۇمىستار اتقاردىق. ەلەۋلى ەڭبەكتىڭ ءبىرى - بۇگىنگى تۇعىرعا قونعان بابالارىمىزدىڭ بەينەسى. اباي مەن ءابۋ ناسىر ءال-فارابي ەسكەرتكىشتەرى جاڭارعان تۇركىستاننىڭ ومىرشەڭ كەلبەتىن قالىپتاستىرۋعا وڭ ىڭپالىن تيگىزەدى، دەپ سەنەمىن»، - دەدى ءومىرزاق شوكەيەۆ.

ايتا كەتەيىك، مەملەكەتتىك حاتشى قىرىمبەك كوشەربايەۆ باستاعان ارنايى دەلەگاتسيا سونداي-اق، وتىرار اۋدانىنداعى قايتا جوندەۋدەن وتكەن ءال-فارابي ەستەرتكىشى مەن «داڭقتى بابالار ساياجولى» اللەياسىندا بولدى.


سوڭعى جاڭالىقتار