جاستار اراسىنداعى يننوۆاتسيالىق يدەيالار بايقاۋى باستالدى

None
None
كوكشەتاۋ. قازاقپارات - اقمولا وبلىسىندا جاستار، ستۋدەنتتەر، جاس كاسىپكەرلەر اراسىندا «AQMOLA POWER» يننوۆاتسيالىق يدەيالار جانە جوبالار بايقاۋى باستالدى، دەپ حابارلايدى قازاقپارات ءتىلشىسى وبلىستىق ىشكى ساياسات باسقارماسىنا سىلتەمە جاساپ.

جاستاردىڭ شىعارماشىلىق، ءبىلىم بەرۋ جانە الەۋمەتتىك باستامالارىن قولداۋ ماقساتىندا جىل سايىن وتكىزىلەتىن يننوۆاتسيالىق جوبالار بايقاۋى ەنەرگەتيكا، اقپاراتتىق تەحنولوگيا، اۋىل شارۋاشىلىعى، ەكولوگيا جانە تابيعاتتى پايدالانۋ سالالارىن قامتيدى. ۇيىمداستىرۋشىلاردىڭ ايتۋىنشا، بيىلعى جىلى شەكتەۋ شارالارىنا بايلانىستى بايقاۋ ماتەريالدارى ونلاين قابىلدانادى.

«ۇسىنىلعان جۇمىستار وزەكتىلىگى، تاقىرىپتى اشۋى، يدەيا جانە كوركەمدىك مازمۇنى، جاڭا تەحنولوگيانى قولدانۋ، عىلىمي جانە جاڭالىعى بويىنشا باعالانادى. ەڭ ۇزدىك يننوۆاتسيالىق يدەيالار كورمەگە قويىلادى»، - دەپ اتاپ ءوتتى وبلىستىق جاستار رەسۋرستىق ورتالىعىنىڭ باسشىسى انارگۇل بەلگىبايەۆا.

بايقاۋعا ءوتىنىش 24-قاراشاعا دەيىن 4 كەزەڭ بويىنشا قابىلدانادى. جەڭىمپازداردى ماراپاتتاۋ جەلتوقسان ايىنا جوسپارلانعان. جەڭىمپازدار 350، 250 جانە 150 مىڭ تەڭگە كولەمىندە اقشالاي سەرتيفيكات الادى. بايقاۋ وسىمەن التىنشى رەت ۇيىمداستىرىلىپ وتىر. وتكەن جىلى 58 ءوتىنىش قابىلداندى. ونىڭ ىشىندە كوكشەتاۋداعى جوعارى تەحنيكالىق كوللەدج ستۋدەنتى ءاليحان قايرانىڭ «ەكولوگيالىق سۋتەگى وتىنى ارقىلى جۇمىس ىستەيتىن، ىشىنەن جاناتىن قوزعالتقىش» يننوۆاتسيالىق جوباسى ۇزدىك دەپ تانىلدى.

سوڭعى جاڭالىقتار