قازاقتىڭ بايىرعى باسپانا اتاۋلارى
ولاردىڭ كەيبىرى جىلدام سوعىلاتىن، قۇرىلاتىن ۇيلەر بولسا، ەندى ءبىرى تۇراقتى تۇرۋعا ارنالعان باسپانا بولعان. سولاردىڭ ايىرماشىلىعىن ءبىلۋ ءۇشىن قازاقتىڭ بايىرعى باسپانا اتاۋلارىن نازارلارىڭىزعا ۇسىنامىز.
اقتاعىر - ەكى قاناتتى ەكى ۇزىكپەن جابىلعان كيىز ءۇيدىڭ شاعىن ءتۇرى.
بالاعان - قابىرعالارى اعاشتان قۇراستىرىلىپ، شوپپەن جابىلعان ۋاقىتشا باسپانا.
جاپپا - كەرەگەسىز كيىزبەن جابىلعان باسپانا.
جەركەپە (جەرتولە) - ۋاقىتشا مەكەندەۋ ءۇشىن تۇتاس نەمەسە دەنى جەردەن قازىلىپ جاسالعان تۇرعىن جەر ءۇي.
جولىم ءۇي - كوشىپ- قونعاندا، جورىققا شىققاندا تەز قۇرۋعا، تىگۋگە ىقشامدالعان، شانىشقان ۋىققا كيىز جاپقان شاڭىراقسىز شوشاق ءۇي.
كيىز ءۇي - اعاش سۇيەكتى، كيىز جابىندى، جينالمالى جازىق ءۇي، باسپانا 4-18 قاناتتىلارى بولادى. جابىندى ۇزىك، تۋىرلىق، تۇندىك كيىزدەردىڭ تۇرىنە قاراي قارا، قاراشا، بوز اق ءۇي قوسارلانا تىگىلگەن كوپ قاناتتىلارى اق وردا دەپ اتالادى.
كۇركە - شاعىن كىشكەنە باسپانا.
كۇركەشە - كۇركەشىك، كۇركەنىڭ شاعىن ءتۇرى.
قورجىن ءۇي - اۋىز ۇيدەن وڭ جاق پەن سول جاققا بولەكتەنىپ، تارتىلعان ەكى (قورجىن) بولمەلى تاس ءۇي.
لاپاس - ءۇش جاق قابىرعاسى بار، توبەسى جەڭىل جەلپى جابىلعان جازعى باسپانا.
لاشىق - جۇپىنى، كوزگە قاراش توزىعى جەتكەن باسپانا.
تام - شاتىرلى توقال ءۇي.
تاسبولات - ءتورت بۇرىشتى، نە قورجىندى قارسى ەسىكتى (ەسىگى تۇستىككە قاراعان) ، بيىكتىگى ءارتۇرلى ءۇي.
سالما - كيىز ءۇيدىڭ كەرەگەسىن كوتەرىپ، ۇستىنە كيىز جابا سالعان ۋاقىتشا باسپانا.
ۋاقىت ءۇي - كوپشىلىك بولىپ سالىنعان ورتاق ءۇي.
ءۇيتاس - كيىز ءۇي پوشىمدى تاس ءۇي.
ۇيشىك - ۋاقىتشا سالىنعان كىشكەنە ءۇي.
شايلا - توبەسىن شوشايتىپ تىككەن باسپانا، قوس.
ءازىمحان ءسادۋاقاستىڭ «ادەت- عۇرىپ، سالت- ءداستۇر» كىتابىنان الىندى