ا ق ش- تاعى سايلاۋ الدى ساۋالناما بويىنشا بايدەن الدا كەلە جاتىر
بۇل جولعى كەزدەسۋدە رەگلامەنت ساقتالدى، ەكى كانديدات بولىنگەن ۋاقىتقا ساي بارىنشا ارگۋمەنتتەرىن ايتۋعا تىرىستى. قىركۇيەكتىڭ 29-ى بولعان العاشقى كەزدەسۋ كانديداتتاردىڭ پىكىر الماسۋىنان گورى ترامپ پەن بايدەننىڭ ۇرسىسۋىمەن ەستە قالدى. وسىنداي ماسەلەلەردى ەسكەرگەن پرەزيدەنتتىك پىكىرسايىس كوميسسياسى بۇگىن سپيكەرلەردىڭ ميكروفوندارىن ءوشىرىپ- قوسىپ تۇرۋدى ۇيعاردى، ياعني ءبىر كانديداتقا بەرىلگەن ەكى مينۋت اياقتالعاننان كەيىن ەكىنشىسىنىڭ ءسوزىن بولمەۋى قاداعالانىپ وتىردى.
جالپى رەگلامەنت بويىنشا 90 مينۋتقا سوزىلعان پىكىرسايىستا باس- اياعى التى تاقىرىپ تالقىلاندى. ونىڭ العاشقىسى پاندەميامەن كۇرەس جانە ۆاكسينانىڭ اينالاسىندا بولدى. بۇل تاقىرىپ ماڭىزدىلىعى بويىنشا امەريكالىق سايلاۋشىلاردى مازالايتىن ەڭ وزەكتى تاقىرىپتاردىڭ ءبىرى. قازىردىڭ وزىندە 8,6 ميلليون امەريكالىق ۆيرۋستى جۇقتىرىپ، 230 مىڭعا جۋىعى قايتىس بولدى. 12 ميلليون ادام جۇمىسسىز وتىر. جاعداي كۇننەن كۇنگە ۋشىعىپ كەلەدى. پاندەميا تاقىرىبىنىڭ ماڭىزدىلىعىن كانديداتتار دا تولىقتاي ءبىلىپ وتىر.
دونالد ترامپ، ا ق ش پرەزيدەنتى:
- بۇل ءبىزدىڭ ەلدە عانا ەمەس، الەمدە بولىپ جاتقان پاندەميا. ەگەر مەنىڭ شەشىمىم بولماعاندا قايتىس بولعانداردىڭ سانى 700000-عا دەيىن جەتەر ەدى. بۇل ۆيرۋس ءبىزدىڭ ەلدە جويىلىپ كەلە جاتىر. ءبىز ۆەنتيلياتورلىق قۇرىلعىلاردى ءوزىمىزدىڭ ەلگە عانا ەمەس، الەم ەلدەرىنە دە تاراتىپ جاتىرمىز. بايدەن 47 جىلدىڭ ىشىندە ەشتەڭە بىتىرگەن جوق.
دجو بايدەن، ا ق ش پرەزيدەنتتىگىنە ۇمىتكەر:
- ترامپ شەكارانى ءبىرىنشى بولىپ جاپقان جوق. وعان دەيىن 40 مەملەكەت شەكارالارىن جاۋىپ ۇلگەرگەن ەدى. تۇسىنىڭىزدەرشى، كۇنىنە مىڭداعان ادام ءولىم جاتىر. مەن پرەزيدەنت بولسام، جاپپاي تەستىلەۋدى قولجەتىمدى ەتەمىن. مەكتەپتەردەگى جاعدايدى جوندەيمىن. ترامپقا قاراعاندا، مەنىڭ جوسپارىم بار.
نەگىزى سايلاۋ الدى ساۋالناما بويىنشا بايدەن ءسوزسىز الدا كەلە جاتىر، ءتىپتى 2016 -جىلى ترامپقا داۋىس بەرگەن پەنسيلۆانيا، ميچيگان، اريزونا سياقتى شتاتتاردىڭ ءوزى بايدەندى قولداپ وتىر. دەگەنمەن، ساراپشىلاردىڭ ايتۋىنشا، قانداي دا ءبىر قورىتىندى شىعارۋعا نەمەسە كىمنىڭ كەلەسى پرەزيدەنت بولارىن ايتۋعا ءالى دە ەرتە.