سۋديالاردىڭ ابىروي-بەدەلى ءمىنسىز بولۋى ءتيىس - قاسىم-جومارت توقايەۆ
بۇل تۋرالى ق ر سۋديالارىنىڭ VIII سەزىندە مەملەكەت باسشىسى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«كاسىبي سوت كورپۋسى - بۇل بارلىق سوت رەفورمالارىنىڭ شەشۋشى فاكتورى. سوڭعى جىلدارى سۋدياعا كانديداتتارعا تالاپتار ارتتىرىلدى، ىرىكتەۋدىڭ زاماناۋي قۇرالدارى ەنگىزىلدى. مىقتى زاڭگەرلەر، كورنەكتى عالىمدار مەن قۇقىقتانۋشىلار سۋديالىق جۇمىستا تاجىريبەسى بولماسا دا سۋديا بولا الادى. مەنىڭشە، بۇل جەردە جوعارعى سوت ءتوراعاسى جاقىپ اسانوۆ ۇلكەن ءرول اتقاردى»، - دەدى پرەزيدەنت.
مەملەكەت باسشىسىنىڭ پايىمىنشا، سوتقا ەكونوميكا مەن قۇقىقتىڭ كۇردەلى ماسەلەلەرىن ەركىن شەشە الاتىن مامانداردى تارتۋ قاجەت.
«بۇل - ۋاقىت تالابى. ونى مەن جولداۋىمدا دا ايتتىم. سۋديالاردىڭ ابىروي- بەدەلى ءمىنسىز، ال كانديداتتاردى ىرىكتەۋ پروتسەسى اشىق ءارى جاريا بولۋى ءتيىس. دامىعان ەلدەردىڭ كوپشىلىگىندە سۋديالارعا قويىلاتىن تالاپتاردىڭ جوعارى بولعانى سونشالىق، وتكەن ومىرىندەگى بولماشى جات قىلىعى لاۋازىمعا ورنالاسۋىنان باس تارتۋعا سەبەپ تە بولۋى مۇمكىن. مۇنداي تاجىريبە قازاقستاندا دا قولدانىلۋى ءتيىس دەپ ەسەپتەيمىن. سۋديا كادرلاردىڭ ساپاسىنا جاۋاپ بەرەتىن جوعارعى سوت كەڭەسىنە سۋديالاردى ىرىكتەۋ جانە دايىنداۋ مىندەتىن ورىنداۋ جۇكتەلگەن. بۇل ساپالى ورىندالۋى ءتيىستى تۇبەگەيلى ماڭىزدى جۇمىس»، - دەدى قاسىم-جومارت توقايەۆ.
اۆتور: مارلان جيەمباي