سوت جۇيەسىن تۇبەگەيلى قايتا قۇرۋ ىسىنە باسا ءمان بەرگەن ءجون - پرەزيدەنت
بۇل تۋرالى ق ر سۋديالارىنىڭ VIII سەزىندە مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«سوتتار تاۋەلسىزدىگى ولشەمى بويىنشا ءبىز 71-ورىندى يەلەندىك. ال زاڭ ۇستەمدىگى يندەكسى بويىنشا 62-ورىنعا تابان تىرەدىك. الايدا احۋالدى تۇبەگەيلى وزگەرتىپ، سوتقا دەگەن سەنىمدى ارتتىرۋ ءۇشىن جۇمىستى جالعاستىرا بەرۋىمىز كەرەك. بيىلعى جولداۋىمدا قۇقىق قورعاۋ جانە سوت جۇيەسىن رەفورمالاۋ قاجەتتىگى تۋرالى ايتتىم. وسىعان وراي مەنىڭ تاپسىرمام بويىنشا ارناۋلى كوميسسيا قۇرىلىپ، ءتيىستى جۇمىستار باستالىپ كەتتى. بۇگىن وسى ماسەلەلەرگە توقتالسام دەيمىن. ەڭ الدىمەن سوت جۇيەسىندەگى ۇدەرىستەرگە ازامات، كاسىپكەر، ينۆەستور مۇددەسى تۇرعىسىنان قاراۋ كەرەك»، - دەدى قازاقستان پرەزيدەنتى.
مەملەكەت باسشىسى ءبىزدىڭ زاڭدارىمىزدىڭ شەتەلدىڭ وزىق زاڭدارىنان ايتارلىقتاي وزگەشىلىگى جوق ەكەندىگىن باسا ايتتى.
«بار ايىرماشىلىق ونى ءتۇسىنۋ جانە قولدانۋ تاسىلىندە. دامىعان مەملەكەتتەر سوت جۇيەسىن رەفورمالاۋ بارىسىندا باسقارۋ عىلىمىن ۇتىمدى پايدالانادى. وندا ادامي رەسۋرسقا، بيزنەس ۇدەرىستەردىڭ قيسىندى بولۋىنا، زاماناۋي تەحنولوگياعا باسىمدىق بەرىلەدى. ءبىر سوزبەن ايتقاندا، بارلىعى دا ادامعا قولايلى بولۋى ءۇشىن جاسالعان. ءبىز سوت سالاسىنداعى رەفورمالاردى بىرتىندەپ جۇزەگە اسىرىپ كەلەمىز. ءبىراق ناقتى ىسكە كەلگەن كەزدە، اسىرەسە، ساقتىققا بوي الدىرامىز. ءتىپتى، وكىلەتتىك ءۇشىن ءوزارا تالاس ءجۇرىپ، يگى باستامانىڭ بەرەكەسى كەتىپ قالادى. سونىڭ سالدارىنان ەلەۋلى وزگەرىسكە قول جەتكىزە الماي وتىرمىز. ال ازاماتتارعا، قوعامعا ناقتى ناتيجە كەرەك. بۇل ايقىن نارسە. سوندىقتان سوت جۇيەسىن تۇبەگەيلى قايتا قۇرۋ ىسىنە جانە ونى ساپالى جۇزەگە اسىرۋعا باسا ءمان بەرگەن ءجون»، - دەدى قاسىم-جومارت توقايەۆ.
اۆتور: مارلان جيەمباي