12:40, 23 - قازان 2020 | GMT +6
ەلوردالىق كولىگىنە جالعان ديپلوماتيالىق ءنومىر تاعىپ الىپ جۇرگەن
نۇر-سۇلتان. قازاقپارات - پوليتسيا قىزمەتكەرلەرى ماڭگىلىك ەل مەن ورىنبور كوشەلەرىنىڭ قيىلىسىندا جالعان ديپلوماتيالىق ءنومىر تاعىپ العان «Mercedes-Benz» اۆتوكولىگىن ۇستادى، دەپ حابارلايدى قازاقپارات قالالىق پوليتسيا دەپارتامەنتىنىڭ Instagram پاراقشاسىنا سىلتەمە جاساپ.
جالعان ءنومىر تاعىپ العان جۇرگىزۋشى اتالمىش كولىكپەن جالپى سوماسى 250 مىڭ تەڭگەلىك ا ە ك سالۋعا نەگىز بولار 12 مارتە جول ەرەجەسىن بۇزعان.
اۆتوكولىك كوممۋنالدىق ايىپپۇل تۇراعىنا جەتكىزىلدى. جالعان نومىرمەن كولىك جۇرگىزگەن 42 جاستاعى جۇرگىزۋشى اكىمشىلىك كودەكستىڭ 590-بابى بويىنشا جاۋاپكەرشىلىككە تارتىلدى.
الداعى سوتتا ول ادامعا 20 ا ە ك ايىپپۇل نەمەسە ءبىر جىلعا جۇرگىزۋشى كۋالىگىنەن ايىرۋ جازاسى تاعايىندالۋى مۇمكىن. بۇرىن اتالمىش كولىككە تاعىلعان ديپلوماتيالىق ءنومىر پولشانىڭ ەلشىلىگىنىڭ كولىگىنە تىركەلگەن. كەيىن ەسەپتەن شىعارىلعان.
ونىڭ قالايشا «Mercedes-Benz» كولىگىنىڭ جۇرگىزۋشىسىندە جۇرگەنىن قازىرگى ۋاقىتتا پوليتسيا قىزمەتكەرلەرى تەكسەرۋدە.
اۆتور: ايان بەكەن ۇلى