بوكستان قازاقستان چەمپيوناتى قاراشا ايىندا وتەدى

None
None
نۇر-سۇلتان. قازاقپارات - بوكستان قازاقستان چەمپيوناتى قاراشا ايىندا شىمكەنت قالاسىندا وتەدى.

بۇل تۋرالى قازاقپارات قازاقستان بوكس فەدەراتسياسىنا سىلتەمە جاساپ حابارلايدى.

«قازاقستان بوكس فەدەراتسياسى شىمكەنتتى 2020-جىلعى ەل چەمپيوناتىن وتكىزەتىن قالا رەتىندە تاڭدادى. ەرلەر مەن ايەلدەر كوماندالارى ءبىر ۋاقىتتا ونەر كورسەتەتىن چەمپيونات 23-29- قاراشا ارالىعىندا وتەدى. شىمكەنتتىڭ رەسپۋبليكالىق جارىستاردى ۇيىمداستىرۋدا تاجىريبەسى مول، چەمپيوناتتىڭ ءساتتى وتەتىنىنە سەنىمدىمىز»، - دەدى فەدەراتسيا پرەزيدەنتى كەڭەس راقىشەۆ.

شىمكەنت 2017-جىلى ەرلەر اراسىندا ەل چەمپيوناتىن وتكىزدى؛ 2019-جىلى بوكستان V جازعى ايەلدەر سپارتاكياداسىن جانە جاستار اراسىندا ەل چەمپيوناتىن وتكىزگەن بولاتىن. بۇگىنگى كۇنى كوروناۆيرۋستى تاراتپاۋ جونىندەگى ۆەدومستۆوارالىق كوميسسيانىڭ دەرەكتەرى بويىنشا شىمكەنت پەن تۇركىستان وبلىسى تۇراقتى ەپيدەميولوگيالىق احۋالى بار «جاسىل ايماققا» كىرەدى، ول ايماقتاردا جاڭا ينفەكتسيامەن سىرقاتتانۋشىلىقتىڭ ەڭ تومەن كورسەتكىشى تىركەلگەن. «ءبىز شىمكەنت قالاسىنىڭ باس سانيتارلىق دارىگەرىنىڭ چەمپيوناتتى وتكىزۋگە رۇقساتىن الدىق جانە بارلىق وڭىرلەردىڭ كوماندالارىن قابىلداۋعا دايىندالىپ جاتىرمىز. بۇل ەرلەر مەن ايەلدەر كوماندالارى قاتىساتىن العاشقى بىرىككەن چەمپيوناتى بولادى. وكىنىشكە وراي، ءبىز كورەرمەندەردى شاقىرا المايمىز، ءبىراق ولار بارلىق جەكپە-جەكتەردى كورۋ مۇمكىندىگىنە يە بولادى. ال ءبىزدىڭ فەدەراتسيا، ارينە، كوماندالاردىڭ دا، جانكۇيەرلەردىڭ دە ريزا بولۋى ءۇشىن جارىستى جوعارى دەڭگەيدە وتكىزۋگە بارلىق جاعدايدى جاسايدى»، - دەدى شىمكەنت بوكس فەدەراتسياسىنىڭ اتقارۋشى ديرەكتورى راحمانبەك ارعىمبايەۆ.

ۇيىمداستىرۋشىلاردىڭ ايتۋىنشا، كوماندالاردىڭ بارلىق مۇشەلەرى جارىس باستالار الدىندا COVID-19 ۆيرۋسىنا تەست ناتيجەلەرىن ۇسىنۋعا مىندەتتى. سپورتشىلار مەن جاتتىقتىرۋشىلارعا قالا بويىنشا قوزعالىستى «قوناق ءۇي - سپورت سارايى» باعىتىمەن شەكتەۋگە ۇسىنىلىپ وتىر. ەرلەر مەن ايەلدەر كوماندالارى وسى جازدا جانە كۇزدە الماتى وبلىسىندا بىرنەشە وقۋ جاتتىعۋ جيىندارىن وتكىزگەن.

«سپورتشىلار جاقسى قالىپتا، ءبىز بارلىق سانيتارلىق تالاپتاردى ساقتادىق، ەشكىم اۋىرمادى، بارلىعى جەكپە-جەكتەرگە شىعۋعا اسىعۋدا، سوندىقتان قازىر بىزگە جارىستار قاجەت»، - دەدى ەرلەر قۇراماسىنىڭ باس باپكەرى عالىمبەك كەنجەبايەۆ.

سوڭعى جاڭالىقتار