مىڭ كۇبى: جاڭاارقادا قىمىز پىسكەن قىزدىڭ ەسكەرتكىشى بوي كوتەردى

قاراعاندى. قازاقپارات - جاڭاارقاعا كىرەبەرىستە «مىڭ كۇبى» ءمۇسىنى ورناتىلدى.

وسىلايشا، اۋىل تۇرعىندارى ءبىر ۋاقىتتا 10 مىڭ ليتر قىمىزدى شايقاۋ بويىنشا الەمدىك رەكورد جەتىستىگىن ماڭگى ساقتاۋ تۋرالى شەشىم قابىلدادى، دەپ حابارلايدى قازاقپارات ءتىلشىسى.

وتكەن جىلى جاڭاارقا اۋدانىندا قازاق حالقىنىڭ ۇلى پەرزەنتى، اقىن، قوعام قايراتكەرى ساكەن سەيفۋلليننىڭ تۋعانىنا 125 جىل جانە اۋداننىڭ 90 جىلدىعى اتاپ ءوتىلدى.

مەرەكەگە وراي الەمدىك رەكورد ورناتىلدى: ءبىر ۋاقىتتا 10 مىڭ ليتر قىمىزدى ارنايى كۇبىدە 1000 جاڭاارقالىق قىز-كەلىنشەك ءپىستى. جەتىستىكتى حالىقارالىق ساراپشىلار بەلگىلەپ الدى.

«مىڭ كۇبى» ءمۇسىنى وسى وقيعاعا ارنالدى. ەرەكشە نىسان كەنت اكىمدىگىمەن ورناتىلعان.

«قازاق قىزىنىڭ بىرەگەي ءمۇسىنى وتكەندى ەسكە تۇسىرەدى جانە ءبىزدىڭ ولكەمىزگە سۇلۋلىق سىيلايدى»، - دەيدى جاڭاارقالىقتار.