بالانىڭ تانىمىن قالىپتاستىراتىن مۋلتفيلمدەردىڭ ءبارى قازاق تىلىندە بولۋى ءتيىس - ەليزاۆەتا سەدىشيەۆا

None
None
نۇر- سۇلتان. قازاقپارات - كينوتەاترلاردىڭ جانە بارلىق تەلەارنالارداعى بالالار مۋلتفيلمدەرىنىڭ ءتىلىن قازاقشاعا كوشىرەتىن ۋاقىت جەتتى.

بۇل تۋرالى «ۇلى دالانىڭ ۇلتارالىق ءتىلى» رەسپۋبليكالىق فورۋمىندا ەلورداداعى «بەرەگينيا» ورىس ەتنومادەني ورتالىعى» قوعامدىق بىرلەستىگىنىڭ مۇشەسى ەليزاۆەتا سەدىشيەۆا ايتتى، دەپ حابارلايدى قازاقپارات ءتىلشىسى.

«مەن تاعدىردىڭ جازۋىمەن تەمىرتاۋ قالاسىنداعى بالالار ۇيىندە تاربيەلەنىپ، قازاقتىڭ تىلىمەن قاتار، كوركەم داستۇرىنە قانىپ ءوستىم. اركەز قاسىمنان تابىلاتىن دوستارىمدى دا قازاق ورتاسىنان تاپتىم. دوستارىم قازاق بولعان سوڭ ۇنەمى سوزدىك قورىمدى بايىتىپ، ءبىلىم كوكجيەگىن كەڭەيتۋگە تىرىسامىن. وسى جەردە تۋىپ، وسى ەلدىڭ ازاماتى بولعاندىقتان، ءتىلدى بىلمەۋ - مەن ءۇشىن اردىڭ ءىسى. قر پرەزيدەنتى قازاق ءتىلى ۇلتارالىق قاتىناس تىلىنە اينالۋى كەرەكتىگىن ءجيى ايتادى. ءتىلدى دامىتۋ ءارقايسىسىمىزدىڭ تىكەلەي مىندەتىمىز. ءتىل - ەڭ الدىمەن حالقىمىزدىڭ تاريحىنىڭ، مادەنيەتىنىڭ ايناسى. ال، مەملەكەتىمىزگە قىزمەت ەتەتىن ازاماتتار وسى قۇندىلىعىمىزدى قاستەرلەسە - ەلىمىز ارى قاراي قارىشتاپ دامي تۇسەتىنى ءسوزسىز»، - دەيدى ەليزاۆەتا سەدىشيەۆا.

ول مەملەكەتتىك ءتىلدىڭ يميدجىن ارتتىرۋ ماقساتىندا جاستار اراسىندا قازاقشا سويلەۋگە شاقىراتىن پىكىر الاڭدارىن، وسىنداي فورۋمدار، ءتۇرلى اكسيالار ءجيى ۇيىمداستىرىلسا دەگەن تىلەگىن ايتتى.

«كينوتەاترلاردىڭ جانە بارلىق تەلەارنالارداعى بالالار مۋلتفيلمدەردىڭ ءتىلىن قازاقشاعا كوشىرەتىن ۋاقىت جەتتى. قازىر اتا- انالاردىڭ جۇمىسباستىلىعىنا بايلانىستى بالالاردى مۋلتفيلمدەر تاربيەلەيتىن بولدى. ەشكىم ۇيرەتپەسە دە بالاباقشا بۇلدىرشىندەرى ورىس، اعىلشىن تىلدەرىن مەڭگەرىپ الادى. كەرىسىنشە ءوز انا- تىلىنە كەلگەندە سويلەي المايدى، سەبەبى ولاردىڭ قازاقشا تانىم- تۇسىنىگىن قالىپتاستىراتىن ورتا جوق، ادام جوق، اتا- انا، اتا- اجە جوق. ءبىزدىڭ بولاشاق بالالارىمىزدىڭ ءتىلى قازاقشا شىعۋى ءتيىس. سوندىقتان ەڭ الدىمەن تەلەديدار ءتىلىن مەملەكەتتىك تىلگە 100 پايىز كوشىرۋىمىز كەرەك دەپ ەسەپتەيمىن»، - دەيدى ول.

اۆتور: زارينا قاھارمان

سوڭعى جاڭالىقتار