ۇلتتىق كەڭەستە كوپبالى وتباسىلاردىڭ باسپانا ماسەلەسى كوتەرىلدى

نۇر- سۇلتان. قازاقپارات - بۇگىن ۇلتتىق قوعامدىق سەنىم كەڭەسىنىڭ ءتورتىنشى وتىرىسىندا كەڭەس مۇشەسى ءلاززات قوجاحمەتوۆا كوپبالى وتباسىلاردىڭ باسپانا الۋى ماسەلەسىن كوتەردى، دەپ حابارلايدى قازاقپارات ءتىلشىسى.

«تۇرعىن ءۇي ساياساتى سالاسىندا ءبىر مەزەتتە جەتى مەملەكەتتىك وپەراتور جۇمىس ىستەيدى ەكەن. ءبىراق، وسى ۋاقىتقا دەيىن باسپانا كەزەگىندە تۇرعان ادامداردىڭ ءتىزىمىن اشىق جاريالايتىن رەسپۋبليكالىق سايت جوق. ياعني كىم كەزەكتەن ءۇي الدى؟ ءوز كەزەگىمەن الىپ جاتىر ما؟ جەمقورلىق فاكتىلەرى ورىن الدى ما؟ وسىنىڭ بارلىعى اشىق تۇردە سايتتا كورىنۋى كەرەك. بىلتىر ءۇي العاندار قازىردىڭ وزىندە كەزەكتە تۇر، كەزەك جاڭارماي جاتىر»، - دەدى ل. قوجاحمەتوۆا.

بۇدان بولەك، ول قازىر قازاقستاندا 30 مىڭعا جۋىق كوپبالالى وتباسى باسپانا كەزەگىندە تۇرعانىن جەتكىزدى.

«ولارعا ارەندالىق باسپانا بەرەدى. ءبىراق جالعا بەرىلەتىن پاتەر مۇراعا قالدىرىلمايدى، اتىنا تۇسپەيتىندىكتەن، حالىق يپوتەكا الىپ، ءوزىنىڭ اتتارىنا تۇسەتىن مەنشىك ءۇي بولعانىن قالايدى. بۇعان بايلانىستى بىزدە قازاقستاندا «7-20-25»، «5-10-20» دەگەن باعدارلامالار شىقتى جانە ولار وتە جاقسى باعدارلامالار دەپ سانايمىز. الايدا، وسى باعدارلامامەن ءۇي الۋدىڭ ءوزىنىڭ قيىندىقتارى بار. ماسەلەن، وسى ەكى باعدارلاما بويىنشا تەك جاڭا ۇيلەرگە عانا يپوتەكا بەرىلەدى. جاڭا ۇيلەردىڭ باعاسى قىمبات، 15 ميلليون تەڭگەگە ءبىر بولمەلى عانا پاتەر الۋعا بولادى. ءتورت- بەس بالاسى بار وتباسىعا ءبىر بولمەلى پاتەردى 20 -جىلعا يپوتەكاعا الۋ ءتيىمسىز»، - دەدى كەڭەس مۇشەسى.

وسى ورايدا، «5-10-20» باعدارلاماسىمەن يپوتەكانى ەكىنشى نارىقتاعى، ياعني ارزان ءارى جوندەۋدەن وتكەن ۇيلەرگە بەرۋ ۇسىنىسى ايتىلدى. بۇدان بۇرىن حابارلانعانداي، كەڭەس مۇشەسى كوروناۆيرۋستىڭ ءبىرىنشى كەزەڭىندە داعدارىس ورتالىقتارىنا جۇگىنگەن ايەل مەن بالا كوبەيگەنىن ايتقان بولاتىن. ونىڭ سوزىنشە، كوپبالالى وتباسىلار تاراپىنان بيزنەس كۋرستارعا دەگەن سۇرانىس جوعارى بولدى.