مەملەكەتتىك قىزمەتكە ورنالاسۋ ءۇشىن قازاق ءتىلىن ۇيرەندىم - ارمەن وگانەسيان

نۇر- سۇلتان. قازاقپارات - مەن مەملەكەتتىك قىزمەتتە جۇمىسقا كىرەمىن دەپ شەشتىم. ال مەملەكەتتىك قىزمەتكەرگە مەملەكەتتىك ءتىلدى بىلمەگەن ۇيات ەكەنىن جاقسى تۇسىنەتىنمىن. سول سەبەپتى وقۋىمدى قازاق تىلىندە جالعاستىردىم.

بۇل تۋرالى «ۇلى دالانىڭ ۇلتارالىق ءتىلى» رەسپۋبليكالىق فورۋمىندا نۇر- سۇلتان قالاسى، مامانداندىرىلعان كۇزەت قىزمەتى باسقارماسىنىڭ پوليتسەيى ارمەن وگانەسيان ايتتى، دەپ حابارلايدى قازاقپارات ءتىلشىسى.

«مەن 1993- جىلى 6- شىلدە وزبەكستان رەسپۋبليكاسى جيزاق وبلىسىندا دۇنيەگە كەلدىم. ۇلتىم - ارميان. وزبەك دوستارىممەن ارالاسىپ، وزبەك ءتىلىن تولىق مەڭگەردىم. ءوز انا تىلىمدە دە جاقسى سويلەيمىن. 14 جاسقا تولعاندا، ياعني 2007 -جىلى وتباسىمىزبەن قىزىلوردا قالاسىنا كوشىپ كەلدىك. ورىس مەكتەبىنە قابىلداندىم. سىنىپتاستارىمنىڭ بارلىعى ءتۇرلى ۇلت وكىلدەرى بولعانمەن، بارلىعى قازاقشا سويلەيتىن. سولارعا قاراپ قاتتى قىزىعاتىنمىن. قازاقستاندا وسپەگەندىكتەن، مەملەكەتتىك تىلدە مەن عانا سويلەمەيتىن ەدىم. سودان قاتتى نامىستانىپ، قايتسەم دە قازاق ءتىلىن ۇيرەنەمىن دەپ شەشتىم»، - دەيدى ارمەن وگانەسيان.

ول دوستارى مەن كورشىلەرىنىڭ ارقاسىندا قازاق ءتىلىن جەتىك مەڭگەرگەن. مەكتەپ بىتىرگەننەن كەيىن قىزىلوردا قالاسىنداعى زاڭ كوللەدجىنە وقۋعا ءتۇسىپ، وقۋىن قازاق تىلىندە جالعاستىرعان.

«مەن مەملەكەتتىك قىزمەتتە جۇمىسقا كىرەمىن دەپ شەشتىم. ال مەملەكەتتىك قىزمەتكەرگە مەملەكەتتىك ءتىلدى بىلمەگەن ۇيات ەكەنىن جاقسى تۇسىنەتىنمىن. سول سەبەپتى وقۋىمدى قازاق تىلىندە جالعاستىردىم. 2014 -جىلى ىشكى ىستەر ورگاندارىنا جۇمىسقا ورنالاسۋ ءۇشىن نۇر- سۇلتان قالاسىنا كەلدىم. 2015 -جىلدان مامانداندىرىلعان كۇزەت قىزمەتى باسقارماسىندا جۇمىس اتقارىپ كەلەمىن. 2016 -جىلى جۇبايىم ديانامەن تانىستىم، ەكەۋمىز ءبىر سالادا قىزمەت اتقارامىز. 2018 -جىلى ەكەۋمىز وتباسىن قۇردىق. مەن دە قالىڭ قازاقتىڭ كۇيەۋ بالاسىمىن. مەدينا ەسىمدى قىزىمىز بار. اكە- شەشەممەن بىرگە تۇرامىز، ەكەۋى دە زەينەتكەر. رۋسلان، ارتۋر ەسىمدى ەكى اعام بار. ەكەۋىدە قازاق قىزدارىنا ۇيلەنگەن. قازاقستانعا كوشىپ كەلگەنىمىزگە ەش وكىنبەيمىن. قازاق حالقىنا ءبىزدى قۇشاق جايىپ قارسى العانى ءۇشىن العىسىم شەكسىز»، - دەيدى ول.

ول مەملەكەت باسشىسىنىڭ قازاق ءتىلىن جاقسى بىلەتىن وزگە ۇلت وكىلدەرىن قولداۋ تۋرالى تاپسىرماسى جاقسى جۇزەگە اسىپ جاتقانىن ايتتى.

«قازاقستان پرەزيدەنتىنىڭ «ءبىز قازاق ءتىلىن جاقسى بىلەتىن وزگە ۇلت وكىلدەرىن قولداۋىمىز كەرەك. مۇنداي ازاماتتار قازاق ءتىلىنىڭ دەڭگەيىن ۇلتارالىق قاتىناس دارەجەسىنە كوتەرۋگە كومەكتەسەدى» دەگەن تاپسىرماسى ءوز دارەجەسىندە ورىندالىپ جاتقانىن جەتكىزگىم كەلەدى. مەملەكەتتىك ءتىلدى ءبىلۋدىڭ ارقاسىندا جۇمىستا جاقسى جەتىستىكتەرگە قول جەتكىزىپ كەلەمىن. سونداي- اق قازاق ءتىلىن ەركىن مەڭگەرگەن جاستاردىڭ ءتىزىمىن جاساپ، ولاردى مەملەكەتتىك قىزمەتتىڭ كادر رەزەرۆىنە الۋ قاجەت دەپ ويلايمىن. ويتكەنى ءتىلدى قۇرمەتتەۋ - سول ەلدى قۇرمەتتەۋ، مەملەكەتتى قۇرمەتتەۋ»، - دەيدى ارمەن وگانەسيان.

اۆتور: زارينا قاھارمان