ۇلتتىق كەڭەس بيلىك پەن قوعام اراسىندا ديالوگ ورناتا الاتىن ينستيتۋتسيونالدى قۇرىلىمعا اينالدى - پرەزيدەنت
«مەنىڭ ويىمشا، بۇگىن ايتىلعان ۇسىنىستار وزەكتى ءارى ماڭىزدى بولىپ شىقتى. ۇلتتىق قوعامدىق سەنىم كەڭەسىنىڭ قۇرىلعانىنا ءبىر جىل تولدى. وسى ارالىقتا كەڭەس تولىق قالىپتاستى. ونىڭ قاجەتتىلىگىنە بارشامىز كوز جەتكىزدىك. ۇلتتىق كەڭەس بيلىك پەن قوعام اراسىندا سىندارلى ديالوگ ورناتا الاتىن ءتيىمدى ينستيتۋتسيونالدى قۇرىلىمعا اينالدى. كەڭەس مۇشەلەرى ەلىمىز ءۇشىن ماڭىزدى شەشىمدەر ازىرلەپ، سولاردىڭ جۇزەگە اسىرىلۋىنا كۇش سالدى. وسىعان دەيىن وتكىزىلشەن ءۇش وتىرىستىڭ بارلىعى دا پايدالى بولعانى ءسوزسىز»، - دەدى قاسىم-جومارت توقايەۆ ۇلتتىق قوعامدىق سەنىم كەڭەسىنىڭ وتىرىسىندا. مەملەكەت باسشىسىنىڭ ايتۋىنشا ۇلتتىق كەڭەستىڭ جۇمىسى شەتەلدىك ساراپشىلاردىڭ قىزىعۋشىلىعىن تۋعىزۋدا.
«پاندەمياعا قاراماستان كەڭەستە وزەكتى ماسەلەلەر تۇراقتى تۇردە تالقىلانىپ كەلەدى. وعان مينيسترلەر دە اتسالىسۋدا. جالپى سىزدەردىڭ ارقالارىڭىزدا بىرنەشە ماڭىزدى باستاما جۇزەگە اسىرىلدى. سونداي-اق، مەملەكەتتىك ساياساتتىڭ ءتۇرلى سالالارىن رەفورمالاۋعا قاتىستى جاڭا ۇسىنىستار ازىرلەنۋدە. وسى تۇستا كەڭەستىڭ بارلىق مۇشەلەرىنە، سونىڭ ىشىندە روتاتسيا بويىنشا مۇشەلىكتەن شىققان ازاماتتارعا جەمىستى جۇمىستارى ءۇشىن العىس ايتامىن»، - دەدى ول.