ەفيردە قازاقتىڭ ءان مەن كۇيى ساڭقىلداپ ەستىلىپ تۇرۋى كەرەك - نۇرتورە ءجۇسىپ

None
None
نۇر-سۇلتان. قازاقپارات - قازاقستان ەفيرىندە قازاقتىڭ ءان مەن كۇيى ساڭقىلداپ ەستىلىپ تۇرۋى كەرەك.

بۇل تۋرالى سەناتتىڭ جالپى وتىرىسىندا سەناتور نۇرتورە ءجۇسىپ ايتتى، دەپ حابارلايدى قازاقپارات ءتىلشىسى.

«مادەنيەت - ۇلتتىق قۇندىلىق قاتارىنا جاتادى. ءبىزدىڭ ۇلتتىق تاۋەلسىزدىگىمىز قازاقستاندى مەكەندەپ وتىرعان بارلىق ۇلت پەن ۇلىس وكىلدەرىن قازاق مادەني كەڭىستىگىندە ءومىر سۇرۋگە جەتەلەيدى. بۇل نە دەگەن ءسوز؟ تۇسىنىكتى بولۋ ءۇشىن مىنا ءبىر نارسەنى ايتا كەتەيىن. شەكارا سىزىعى نە ءۇشىن سىزىلادى؟ بۇل - ەلدىڭ قورعانىس شەكاراسى عانا ەمەس، مادەنيەت شەكاراسى دەگەن ءسوز. وسى سىزىقتىڭ ىشىندە مادەني كەڭىستىك بولادى. مادەني كەڭىستىك اياسىندا ۇلتتىق قۇندىلىقتار قالىپتاسادى. ءبىز ءال-فارابيدىڭ، ابايدىڭ جانە باسقا تاريحي تۇلعالاردىڭ مەرەيتويلارىن تەك توي تويلاۋ ءۇشىن وتكىزبەيمىز. بۇل شارالار قازاقستان حالقىن ءبىرتۇتاس - ءبىر مادەنيەت شەڭبەرىندە تاربيەلەۋگە باعىتتالعان. قازاق تاريحىن، ادەبيەتى مەن مادەنيەتىن، تۇرمىس سالتىن، ءداستۇرىن ءبىلۋ، قۇرمەتتەۋ، مويىنداۋ - مادەني كەڭىستىكتىڭ العىشارتى»، - دەدى سەناتور.

وسى تۇرعىدان العاندا نۇرتورە ءجۇسىپ قاراۋعا ۇسىنىلعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ق ر زاڭىنىڭ جوباسىندا ءبىرقاتار جاڭا نورما بار ەكەندىگىن اتاپ ءوتتى.

«ونەردە تازالىق كەرەك! ومىردە دە سولاي. فونوگراممامەن ءان ايتۋ شەكتەلەدى. بۇل تازا تالانتتارعا جول اشادى. زاڭ جوباسىندا ءتيىستى نورمالار قاراستىرىلعان. مۇنى قولدايمىن. قازاقستاننىڭ تۇڭعىش پرەزيدەنتى - ەلباسى تاپسىرماسىمەن «مادەني مۇرا» باعدارلاماسى جاسالدى.

«قازاقتىڭ 1000 ءانى»، «قازاقتىڭ 1000 كۇيى» جيناقتالدى. سونىمەن ءىس ءبىتتى مە؟ قازاقتىڭ 1000 ءانى، مەن 1000 كۇيى ەفيردەن نەگە ەستىلمەيدى؟ ەفير - قازاقستان ەفيرى. ونداعى جيىلىكتى مەملەكەت بەرەدى. قازاقستاندا جۇمىس ىستەيتىن ءتۇرلى راديو ارناسى ەفيرلىك جيىلىكتى كونكۋرس ارقىلى الادى. ەندەشە نەگە ءبىز مەملەكەتتىڭ مادەني مۇراسىن كەڭىنەن ناسيحاتتاۋ ماسەلەسىن تالاپ ەتە المايمىز؟ راديو تاراتۋشىلارعا نەگە مىندەتتەي المايمىز؟ قازاقستان ەفيرىندە قازاقتىڭ ءان مەن كۇيى ساڭقىلداپ ەستىلىپ تۇرۋى كەرەك. سوندا عانا ەلدەگى رۋحاني جاڭعىرۋ ەرەكشە سيپاتقا يە بولادى. الداعى ۋاقىتتا وسى تالاپ ەسكەرىلسە دەيمىز»، - دەدى ول.


سوڭعى جاڭالىقتار