پەتروپاۆل حالىقارالىق اۋەجايى بانكروت دەپ تانىلماق

پەتروپاۆل. قازاقپارات - پەتروپاۆل حالىقارالىق اۋەجايى قىزمەتكەرلەرى بىرنەشە ايدان بەرى ەڭبەكاقىسىز وتىر.

ولاردىڭ الاشاعى 24 ميلليون تەڭگەگە جۋىق، دەپ حابارلايدى قازاقپارات ءتىلشىسى.

س ق و اكىمى باسپا ءسوز قىزمەتىنىڭ مالىمەتىنشە، پەتروپاۆل حالىقارالىق اۋەجاي قىزمەتكەرلەرى ونلاين تۇردە وتكەن ءوڭىر باسشىسى قۇمار اقساقالوۆتىڭ قوعامدىق قابىلداۋىنا قاتىستى.

مامانداردىڭ ايتۋىنشا، ەلدە كارانتيندىك شەكتەۋلەر ەنگىزىلگەلى ولاردىڭ جاعدايلارى قيىنداعان.

قازىر كومپانيا قىزمەتكەرلەرىنە ەڭبەكاقى بويىنشا 24 ميلليون تەڭگە شاماسىندا بەرەشەك.

«ەكى ايدىڭ ىشىندە اۋەجاي بانكروت دەپ تانىلۋ ءۇشىن ارنايى پروتسەدۋرانى وتەدى. كومپانيا «سولتۇستىك» الەۋمەتتىك كاسىپكەرلىك كورپوراتسياسىنىڭ بالانسىنا وتەدى. ياعني، مەملەكەت مەنشىگىنە الادى. كەلەر جىلدىڭ بيۋجەتىنە اۋەجايدى ۇستاۋعا قاجەت قاراجاتتى ەنگىزدىك. بارلىق شىعىن جەرگىلىكتى بيۋجەت ەسەبىنەن وتەلەدى»، - دەدى س ق و اكىمى قۇمار اقساقالوۆ.

ناتيجەسىندە بۇرىنعى رەيستەردەن بولەك، جاڭا باعىتتار بويىنشا دا ۇشاقتار شىعارىلماق. مامانداردىڭ جۇمىس ورنى ساقتالىپ قالادى جانە ەڭبەكاقىلارى دا وسپەك. پەتروپاۆل حالىقارالىق اۋەجايى وسىدان 4 جىل بۇرىن كۇردەلى جوندەۋدەن ءوتتى.

قازىر پەتروپاۆل حالىقارالىق اۋەجايىنان نۇر-سۇلتان، الماتى، شىمكەنت قالالارىنا عانا رەيستەر بار.