اۋىزبەن دەم الۋدىڭ زيانى

نۇر- سۇلتان. قازاقپارات - ۇيقى ساپاسىنىڭ تومەندەۋى تەحنولوگيا دامىعان زاماندا ادامنىڭ باستى پروبلەماسىنىڭ بىرىنە اينالدى. ونىڭ سەبەبى ءتۇرلى بولۋى مۇمكىن.

مىسالى، قورىلدايتىن ادامنىڭ ۇيقىسى ناشار بولىپ قويماي، تىنىس الۋى بۇزىلادى. ال تەك مۇرىنمەن دەم الاتىنداردىڭ ۇيقىسى تىنىش، دەنساۋلىعى مىعىم بولادى دەيدى عالىمدار.

مۇرىننىڭ تىنىس الۋ پروتسەسىندەگى ماڭىزى زور. ونىڭ الدىڭعى بولىگى شىرىشتى جانە تۇكتى كەلەدى. وسىنىڭ ارقاسىندا لاس اۋانى تازالاپ، قۇرعاق اۋانى دىمقىلداندىرادى.

ال اۋىز ارقىلى دەم العاندا قۇرعاق اۋا بىردەن وكپەگە ءتۇسىپ، ەشقانداي سۇزگىدەن وتپەيدى. اۋىزدان كىرگەن اۋا ءسال عانا جىلىپ، كەڭىردەكتەن بىردەن وكپەگە تۇسەدى. سوندىقتان تەك ۇيىقتاعاندا ەمەس، كۇندەلىكتى ومىردە اۋىزبەن تىنىس الۋدىڭ زيانى كوپ.

ۇزاق ۋاقىت اۋىزبەن دەم الۋ مىنا جاعدايلارعا دۋشار ەتۋى مۇمكىن:

- اۋىزدىڭ قۇرعاۋى؛

- اۋىزدان جاعىمسىز ءيىس شىعۋى؛

- قىزىل يەكتىڭ بۇزىلۋى؛

- اۋىز قۋىسى گيگيەناسىنىڭ ناشارلاۋى؛

- بالالاردىڭ تاڭدايى مەن جاعىنىڭ دۇرىس وسپەۋى؛

- ورتودونتيالىق پروبلەمالار؛

- جۇمساق تاڭدايدىڭ سالبىراۋى؛

- ۇيقى ساپاسىنىڭ ناشارلاۋى سالدارىنان كۇنى بويى السىزدىك سەزىنۋ.

كەيبىر ادامداردىڭ قانشا اۋىزبەن دەم الۋعا تىرىسقانىمەن قولىنان كەلە بەرمەيدى. اللەرگياسى بار ادامداردا، مۇرىننىڭ قيسايعاندا، مۇرىن قۋىسى اۋرۋى بار جانە تاماق‚ كومەي بەزدەرى ىسىگەندە مۇرىنمەن دەم الۋى قيىنداپ، تەك اۋىزبەن تىنىس الۋعا يتەرمەلەيدى.

massaget.kz