كوروناۆيرۋس: قازاقستان نەلىكتەن رەسەي ۆاكسيناسىنا باسىمدىق بەرىپ وتىر
بۇل سۇراققا بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ق ر دەنساۋلىق ساقتاۋ ءبىرىنشى ۆيتسە- ءمينيسترى مارات شورانوۆ جاۋاپ بەردى، دەپ حابارلايدى قازاقپارات ءتىلشىسى.
«راسىمەن دە، «س ق- فارماتسيا» كومپانياسىمەن جانە رەسەي فەدەراتسياسىنىڭ تىكەلەي ينۆەستيتسيالار قورى اراسىندا مەموراندۋم جاسالدى. ول مەموراندۋمدا كلينيكالىق زەرتتەۋلەردىڭ بارلىق ساتىسىنان وتكەن جاعدايدا رەسەيلىك «سپۋتنيك- ۆ» ۆاكسيناسىن باسىم تۇردە جەتكىزۋ تۋرالى ايتىلعان. ياعني مەموراندۋم - ناقتى كەلىسىمشارت ەمەس. ول كلينيكالىق زەرتتەۋلەردىڭ بارلىق ساتىسىنان وتكەن جاعدايدا عانا، ۆاكسينالاردى تالداۋ كەزىندە «سپۋتنيك- ۆ» ۆاكسيناسىنا باسىمدىق بەرە وتىرىپ، قاراستىرۋعا كەپىلدىك بەرەدى»، - دەدى مارات شورانوۆ.
ونىڭ ايتۋىنشا، قازىرگى ۋاقىتتا قازاقستاندىق ۆاكسينانى سىناقتان وتكىزۋدىڭ ءبىرىنشى جانە ەكىنشى كلينيكالىق ساتىلارى سوڭىنا تاياپ كەلەدى.
«ءبىلىم جانە عىلىم مينيسترلىگىمەن اۋقىمدى جۇمىس جۇرگىزىلۋدە. الەم ەلدەرىنە قاراعانىمىزبەن ۆاكسينانى ناقتى قاشان، قالاي جەتكىزە الاتىن مەملەكەتتەردىڭ بارى تۋرالى ايقىن مالىمەت جوق. كوبى حالىقتىڭ 20 پايىزىن ۆاكسينامەن قامتۋ مۇمكىندىكتەرى بارىن العا تارتىپ، سونىمەن قاتار ۆاكسينانىڭ تيىمدىلىگى راستالماستان الدىن الا اقى سۇرايدى. وسىعان بايلانىستى، اتالمىش ماسەلەنى كەڭىنەن زەرتتەۋدەمىز»، - دەدى ول.
دەنساۋلىق ساقتاۋ مينيسترلىگى الەمدەگى بۇكىل كلينيكالىق زەرتتەۋلەردى زەردەلەپ، باعىپ وتىراتىن ارنايى جۇمىس توبىن قۇرعان.
«الەمدەگى ۆاكسينالار بويىنشا بارلىق نۇسقا زەرتتەلۋدە. الايدا، الدىن الا بەرىلگەن اقپاراتقا سايكەس، نەگىزگى ۇمىتكەر رەتىندەگى ۆاكسينالاردى زەرتتەۋدىڭ ءۇشىنشى ساتىسى العاشقى توقساندا (2021 -جىلدىڭ) اياقتالادى»، - دەدى ول.
اۆتور: ايان بەكەن ۇلى