ءماجىلىس دەپۋتاتتىعىنا كىمدەر كانديدات بولا المايدى
ول ورتالىق سايلاۋ كوميسسياسى بەلگىلەنگەن وكىلەتتىكتەرگە سايكەس، ق ر پرەزيدەنتى مەن پارلامەنتى ءماجىلىسى دەپۋتاتتارىنىڭ سايلاۋىنا دايىندىقتى جانە ونى وتكىزۋدى ۇيىمداستىراتىنىن حابارلادى. وسىعان بايلانىستى، پارتيالىق تىزىمدەر بويىنشا سايلاناتىن ءماجىلىس دەپۋتاتتارىنىڭ سايلاۋىنا دايىندىق جانە ونى وتكىزۋ جونىندەگى نەگىزگى ءىس- شارالاردىڭ كۇنتىزبەلىك جوسپارى بەكىتىلدى.
پارلامەنت ءماجىلىسىنىڭ دەپۋتاتتىعىنا ەل اۋماعىندا سوڭعى 10 جىلدا تۇراقتى تۇرىپ جاتقان، 25 جاسقا تولعان قازاقستان رەسپۋبليكاسىنىڭ ازاماتى كانديدات بولا الادى. قازاقستان پارلامەنتىنىڭ دەپۋتاتتىعىنا، ونىڭ ىشىندە پارتيالىق تىزىمدەر بويىنشا كانديدات بولا المايدى:
1) زاڭدا بەلگىلەنگەن تارتىپپەن وتەلمەگەن نەمەسە الىنباعان سوتتىلىعى بار ادام؛
2) سوتپەن زاڭدا بەلگىلەنگەن تارتىپپەن سىبايلاس جەمقورلىق قىلمىس جانە سىبايلاس جەمقورلىق قۇقىق بۇزۋشىلىق جاساۋدا كىناسىن مويىنداعان ادامدى. پارتيالىق تىزىمدەر بويىنشا سايلاناتىن ءماجىلىس دەپۋتاتتىعىنا كانديداتتار ۇسىنۋ قۇقىعى بەلگىلەنگەن تارتىپپەن تىركەلگەن ساياسي پارتيالارعا تيەسىلى.
ساياسي پارتيا پارتيالىق تىزىمدەردى بەكىتۋ كەزىندە وعان ەنگىزىلگەن ادامداردىڭ جالپى سانىنىڭ كەمىندە 30 پروتسەنتى مولشەرىندە ايەلدەر مەن 29 جاسقا تولماعان ادامداردى قامتيدى. بەكىتىلگەن جوسپارعا سايكەس، كانديداتتاردى ۇسىنۋ كەزەڭى داۋىس بەرۋ كۇنىنەن ەكى اي بۇرىن باستالادى جانە داۋىس بەرۋ كۇنىنەن قىرىق كۇن بۇرىن جەرگىلىكتى ۋاقىتپەن ساعات ون سەگىزدە اياقتالادى. ياعني، اعىمداعى جىلعى 10 - قاراشادان باستاپ 30 - قاراشا كۇنگى ساعات 18-00-گە دەيىن. پارتيالىق تىزىمدەردى تىركەۋ سايلاۋدان ەكى اي بۇرىن باستالادى جانە سايلاۋعا ءبىر اي قالعاندا جەرگىلىكتى ۋاقىتپەن ساعات 18.00-دە اياقتالادى. ياعني، 2020 -جىلعى 10- قاراشادان 10 جەلتوقسان كۇنگى ساعات 18:00-گە دەيىن.
زاڭعا سايكەس، سايلاۋ الدىنداعى ۇگىت پارتيالىق تىزىمدەردى تىركەۋ مەرزىمى اياقتالعان كەزدەن باستالادى جانە سايلاۋ بولاتىن كۇننىڭ الدىنداعى كۇنگى جەرگىلىكتى ۋاقىت بويىنشا ساعات 00.00-دە اياقتالادى. وسىلايشا، پارتيالىق تىزىمدەر بويىنشا سايلاناتىن پارلامەنت ءماجىلىسى دەپۋتاتتارىنىڭ كەزەكتى سايلاۋىنىڭ جالپى ۇزاقتىعى تاعايىندالعان كۇننەن باستاپ داۋىس بەرۋ كۇنىنە دەيىن 82 كۇندى قۇرايدى.
ايتا كەتەيىك، بۇگىن مەملەكەت باسشىسى قاسىم- جومارت توقايەۆ ق ر پارلامەنتى ءماجىلىسى جانە ءماسليحات دەپۋتاتتارى سايلاۋىن تاعايىنداۋ تۋرالى ۇندەۋ جاريالادى. «بۇگىن مەن پارلامەنت ءماجىلىسى دەپۋتاتتارىنىڭ سايلاۋىن تاعايىنداۋ تۋرالى جارلىققا قول قويدىم. ورتالىق سايلاۋ كوميسسياسىنىڭ قاۋلىسىمەن بارلىق دەڭگەيدەگى ءماسليحات دەپۋتاتتارىنىڭ سايلاۋى تاعايىندالادى. الداعى سايلاۋ كونستيتۋتسيالىق مەرزىمگە سايكەس، 2021 -جىلدىڭ 10 - قاڭتارىندا وتەدى. بارلىق ساياسي پارتيالاردىڭ بۇل سايلاۋ ناۋقانىنا قاتىسۋعا دايىندالۋىنا، سايلاۋ الدىنداعى پلاتفورماسىن ازىرلەۋىنە، پارتيالىق ينفراقۇرىلىمداردى جەتىلدىرۋىنە ۋاقىتى جەتكىلىكتى بولدى. ورتالىق سايلاۋ كوميسسياسى مەن باس پروكۋراتۋرا سايلاۋدىڭ زاڭدىلىعىن، اشىقتىعىن جانە ادىلدىگىن ساقتاۋ ءۇشىن تۇراقتى باقىلاۋ جۇرگىزىپ وتىرادى»، - دەدى پرەزيدەنت.
اۆتور: رۋسلان عابباسوۆ