مەملەكەت باسشىسى «شيەۆرون» كومپانياسى ديرەكتورلار كەڭەسىنىڭ ءتوراعاسىن قابىلدادى

نۇر- سۇلتان. قازاقپارات - قازاقستان پرەزيدەنتى قاسىم- جومارت توقايەۆ «شيەۆرون» كومپانياسى ديرەكتورلار كەڭەسىنىڭ ءتوراعاسى جانە باس اتقارۋشى ديرەكتورى مايكل ۋيرتتى قابىلدادى، دەپ حابارلايدى اقوردا.

قاسىم- جومارت توقايەۆ بەينەبايلانىس فورماتىندا «شيەۆرون» كومپانياسى ديرەكتورلار كەڭەسىنىڭ ءتوراعاسى جانە باس اتقارۋشى ديرەكتورى مايكل ۋيرتپەن كەزدەسۋ وتكىزدى. كەزدەسۋ بارىسىندا «شيەۆرون» كومپانياسىنىڭ قازاقستانمەن اراداعى ءوزارا ءىس- قيمىلداردىڭ پەرسپەكتيۆاسى، ءالى جالعاسىپ جاتقان COVID-19 پاندەمياسى جاعدايىندا كومىرسۋتەگى سەكتورىنداعى ءبىرقاتار جوبانى ىسكە اسىرۋ ماسەلەلەرى، سونداي- اق، الەمدىك ەنەرگەتيكا نارىعىنىڭ احۋالى تالقىلاندى.

مەملەكەت باسشىسى «شيەۆرون» كومپانياسىمەن ىنتىماقتاستىقتى جانە ونىڭ قازاقستان ەكونوميكاسىن دامىتۋعا قوسقان ۇلەسىن جوعارى باعالادى. «شيەۆرون» كومپانياسى تەڭىز جانە قاراشىعاناق مۇناي- گاز سەكتورىنداعى ءىرى جوبالاردى ىسكە اسىرۋدا سەنىمدى سەرىكتەس رەتىندە ەلىمىزدىڭ ەنەرگەتيكا نارىعىندا وتە بەلسەندى قىزمەت اتقارۋدا. وكىنىشكە قاراي، كوروناۆيرۋس پاندەمياسى مۇناي جانە گاز يندۋسترياسىنا كەرى اسەرى ەتىپ، مۇنايعا دەگەن سۇرانىس پەن ۇسىنىس اراسىنداعى تەپە تەڭدىكتى بۇزدى جانە ونىڭ باعاسىن تومەندەتتى»، - دەدى قاسىم- جومارت توقايەۆ.

پرەزيدەنت 2022 -جىلعا قاراي تەڭىز كەن ورنىنداعى ءوندىرىس قۋاتىن كەڭەيتۋ جونىندەگى جوبالاردى ۋاقىتىلى ىسكە قوسۋ قازاقستان ءۇشىن ماڭىزدى ەكەنىن ايتتى. مەملەكەت باسشىسى كومپانيانىڭ جوبانى ىسكە اسىرۋ قىزمەتىن قۇپتاپ، ءبىرقاتار مىندەتتەردىڭ مەرزىمىنەن بۇرىن ورىندالىپ جاتقانىن اتاپ ءوتتى. سونىمەن قاتار كوروناۆيرۋس پاندەمياسىنا قارسى ءىس- قيمىل ماسەلەلەرى تالقىلاندى. مەملەكەت باسشىسى كوروناۆيرۋس ينفەكسياسىن جاپپاي جۇقتىرۋدىڭ الدىن الۋ بويىنشا جوعارى دەڭگەيدە ۇيلەستىرىلگەن جۇمىسى جانە سانيتارلىق- ەپيدەميولوگيالىق جاعدايدى تۇراقتاندىرعانى ءۇشىن «تەڭىزشيەۆرويل» كومپانياسىنا ريزاشىلىعىن ءبىلدىردى.

پرەزيدەنت قازاقستاننىڭ دەنساۋلىق ساقتاۋ مينيسترلىگىنە جالپى قۇنى 20 ميلليون ا ق ش دوللارى بولاتىن مەديتسينالىق بۇيىمداردى، ءدارى- دارمەكتەر مەن قورعانىش قۇرالدارىن بەرگەنى، شەتەلدىك دارىگەرلەر مەن ەپيدەميولوگتاردىڭ ەلىمىزگە كەلۋىن ۇيىمداستىرعانى، سونداي- اق، قۇلسارى قالاسىندا 200 ورىندىق ينفەكسيالىق اۋرۋحانا قۇرىلىسىن قارجىلاندىرعانى ءۇشىن مايكل ۋيرتكە العىس ايتتى.

بۇدان بولەك، قاسىم- جومارت توقايەۆ تەڭىزدەگى جوبالاردى ىسكە اسىرۋدا قازاقستاندىق ۇلەستى قامتاماسىز ەتۋدىڭ ماڭىزدى ەكەنىنە نازار اۋداردى. بۇل رەتتە، بىرلەسكەن ينۆەستيتسيالىق جوبالاردى ىسكە اسىرۋ بارىسىندا جەرگىلىكتى ۇلەس قورىن قۇرۋ جاعىن قاراستىرۋدى ۇسىندى.

مەملەكەت باسشىسى قاراشىعاناق مۇناي كەن ورنىن يگەرۋ ماسەلەلەرىنە توقتالىپ، اتالعان جوبانى ۋاقىتىلى ىسكە اسىرۋدى قامتاماسىز ەتۋ جانە جىلىنا مۇناي ءوندىرۋ كولەمىن 10-11 ميلليون توننا مولشەرىندە ۇستاپ تۇرۋ قاجەتتىگىن اتاپ ءوتتى.

مايكل ۋيرت 2019 -جىلى قاسىم- جومارت توقايەۆپەن نۇر- سۇلتان جانە نيۋ- يورك قالالارىندا اڭگىمەلەسكەن ساتتەرىن ەسكە الىپ، كەزدەسۋگە تاعى دا مۇمكىندىك بەرگەنى ءۇشىن العىس ايتتى.

«ءبىزدىڭ كوپ جىلعى ارىپتەستىگىمىزدى جوعارى باعالايمىن. قازاقستان - ءبىز ءۇشىن ەرەكشە ەل جانە كومپانيامىزدىڭ جۇمىسىنداعى اسا ماڭىزدى باعىت. سوندىقتان ءبىز قازاقستاننىڭ ەنەرگەتيكا سالاسىنداعى، اتاپ ايتقاندا، تەڭىز جانە قاراشىعاناق كەن ورىندارىنداعى ءوزارا ءىس- قيمىلداردى جالعاستىرۋعا نيەتتىمىز. قازاقستان - مۇناي- گاز رەسۋرستارى بار كەرەمەت ەل جانە ءبىز ءتۇرلى جوبالاردى ىسكە اسىرۋدا ەلىڭىزدىڭ سەنىمدى سەرىكتەسى بولعانىمىزعا قۋانىشتىمىز»، - دەدى «شيەۆرون» كومپانياسىنىڭ اتقارۋشى ديرەكتورى.