جاڭا زەلانديادان كەلگەن ساراپشى كوروناۆيرۋسپەن كۇرەسۋدىڭ تاجىريبەسى تۋرالى ايتتى

الماتى. قازاقپارات - س. اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتى وتكىزگەن ونلاين كونفەرەنسيا بارىسىندا شەتەلدىك ماماندار كوروناۆيرۋسپەن كۇرەستە جيناقتاعان تاجىريبەلەرىمەن ءبولىستى، دەپ حابارلايدى قازاقپارات ءتىلشىسى.

جيىندا جاڭا زەلانديانىڭ ۆەللينگتون قالاسىنداعى وتاگو ۋنيۆەرسيتەتىنىڭ پروفەسسورى مايكل بەيكەر COVID-19 بەن كۇرەستە ءبىرىنشى مەديتسينالىق-سانيتارلىق كومەك جۇيەسى قالاي ۇيىمداستىرىلعانىن ايتىپ بەردى. ونىڭ ايتۋىنشا، پاندەميانىڭ دامۋى ءتۇرلى سەناريلەرگە بايلانىستى وزگەرىپ وتىرادى.

سوندىقتان، ءار ەلدىڭ دەنساۋلىق ساقتاۋ جۇيەسىندە ءتۇرلى جاعدايعا دايىندىق جاسالۋى كەرەك. پاندەميا باستالا سالعان كەزدە جاڭا زەلانديا ماماندارى ادام ءولىمى 0,3 پايىز بولادى دەپ جوسپارلاعان.

«بۇل تۇماۋدان بىرنەشە ەسە قاۋىپتى ۆيرۋس ەكەنى باسىنان-اق بايقالدى. قاڭتاردا جاھاندىق پاندەميا بولاتىنى انىق بولدى. اقپاندا قىتايدىڭ مالىمەتتەرىن تالداي كەلە پاندەميانى اۋىزدىقتاۋعا بولاتىنىن تۇسىندىك. ناۋرىز ايىندا ۆيرۋس جاڭا زەلاندياعا دا كەلە باستادى. ەل بيلىگى رەسۋرستاردىڭ شەكتەۋلى بولۋىنا بايلانىستى، تەستىلەردىڭ جەتىسپەيتىنىن تۇسىنگەن سوڭ لوكداۋن تۋرالى شەشىم قابىلدادى. بۇل جۇقتىرۋ تىزبەگىن ءۇزۋ ءۇشىن كەرەك بولدى. اقپان ناۋرىزدا عالىمدار ارنايى ستراتەگيا قۇردى. قۇجاتقا سايكەس كوروناۆيرۋستىڭ 19 ىقتيمال جاعدايىندا لوكداۋن جاريالاۋ قولعا الىندى»، - دەدى بەيكەر.

ونىڭ ايتۋىنشا، تۋريستىك ەل بولىپ سانالاتىن جاڭا زەلاندياعا كەلۋشىلەردىڭ سانى تاۋلىنە 15 مىڭنان 500 گە دەيىن ازايعان. ءتىپتى ەشكىم كەلمەگەن، ەشكىم شىقپاعان كۇندەر دە بولعان. بۇل - ەلدىڭ تاريحىندا بولماعان جاعداي. 5 ميلليون حالىق اراسىندا تاۋلىگىنە 20 مىڭ ادامعا دەيىن تەست تاپسىرعان. بۇل دا ەل تاريحىندا ءبىرىنشى رەت بولعان جاعداي.

«بارلىق حالىق 7 اپتا ۇيىندە وتىردى. بۇل شارانىڭ ارقاسىندا ەلدە ۆيرۋس جويىلدى. جاڭا زەلانديا - ۆيرۋستان تازا ەلگە اينالدى. 5 ميلليون ادامنىڭ ىشىندە 29 ادام ۆيرۋستان كوز جۇمدى. لوكداۋن كەزىندە ءولىم ءجىتىم كورسەتكىشى، مەن تۇماۋ تيۋ وقيعالارى تىركەلگەن جوق»، - دەدى ساراپشى.

لوكداۋن كەزىندە ەلدە ەكونوميكادا قىسقارتۋ، وڭتايلاندىرۋ قولعا الىنعان. الايدا جۇمىس ورىندارىن قىسقارتۋ تىركەلمەدى. جاقىندا ەل ەكونوميكاسى بۇرىنعى الەۋەتىنە قايتا ورالادى دەپ بولجانىپ وتىر. ايتا كەتۋ كەرەك، عىلىمي كونفەرەنسيا اكادەميك، عالىم قازاقستان تاعام تانۋ ينستيتۋتىنىڭ پرەزيدەنتى تورەگەلدى شارمانوۆتىڭ 90 جىلدىق مەرەيتويىنا ارناپ ۇيىمداستىرىلدى.