رەسپۋبليكالىق تۋرنيردە اسىل تۇقىمدى ات مارەگە جەتكەندە ءولىپ كەتتى - ۆيدەو

نۇر-سۇلتان. قازاقپارات - ەلوردادا ۇلتتىق ات سپورتى تۇرلەرىنەن وتكەن رەسپۋبليكالىق تۋرنير كەزىندە اسىل تۇقىمدى سايگۇلىكتىڭ ءبىرى «ۇلكەن الامان» بايگە كەزىندە مارەگە جەتىپ، ءولىپ كەتكەن.

«حابار 24» تەلەارناسىنىڭ حابارلاۋىنشا، تۋرنيرگە قاتىسىپ جاتقان ات مارەگە جەتكەندە كەنەتتەن تەڭسەلىپ، جەرگە قۇلاپ تۇسكەن. ونىڭ اياق استىنان ولگەن ءساتى كامەراعا ءتۇسىپ قالعان. تەلەارنانىڭ مالىمەتىنشە، «ۇلكەن الامان» بايگە ناعىز تۇلپارلار سىنالاتىن جارىس. بۇل سىندا 31 قاتىسۋشىنىڭ تەك 17 سى عانا 25 شاقىرىمدىق قاشىقتىقتى ەڭسەرە العان. ورىن العان جاعدايعا ات سپورتى بويىنشا جاتتىقتىرۋشى سەكەناي بوبەكباي پىكىر ءبىلدىردى.

«ول قۇلاپ ءولدى، دەمەك دايىن بولماعان. بۇعان جاتتىقتىرۋشى كىنالى. ول جىلقىنىڭ جان دۇنيەسىن سەزىنبەيدى. ەگەر باپكەر جاقسى بولىپ، جانۋاردى تيىسىنشە باپتاسا، ات ولمەيدى. ونىڭ ۇستىنە قازىر كۇزدىڭ بەل ورتاسى»، - دەيدى مامان.

تۋرنيرگە قازاقستاننىڭ ءار ايماعىنان جۇزدەن استام شاباندوز قاتىسقان. ولار ءتورت قاشىقتىقتان تۇراتىن: «جورعا جارىس»، «قۇنان بايگە»، «كىشى الامان» جانە «ۇلكەن الامان» بايگە بويىنشا سىنعا تۇسكەن. تۋرنيردىڭ جالپى جۇلدە قورى 20 ميلليون تەڭگەنى قۇراعان.

ەسكە سالساق، بۇعان دەيىن قىزىلوردا وبلىسىنىڭ تۇرعىندارى جاڭاقورعاندا بەلگىسىز دەرتتەن 200 -جىلقى قىرىلىپ قالعانىن ايتىپ، دابىل قاققان بولاتىن. وبلىستىق ۆەتەرينارلار بولسا، جاڭاقورعان اۋدانىنداعى 4 اۋىلدا ىندەت تىركەلگەنىن راستاعان ەدى.