نەگە ءىشىمىز پىسادى؟

نۇر-سۇلتان. قازاقپارات - زەرىگىپ، نە ىستەرىن بىلمەگەن ادام اينالىسارعا ءىس تاپپاي وتىرادى. بۇل دا ءبىر پسيحولوگيالىق كۇي.

ادام ەشقاشان وزىنە سىرتتاي باعا بەرە المايدى. دەمەك، ءىشى پىسىپ وتىرعانىن دا بايقامايدى. ەندەشە وسى ءبىر ەرەكشە پسيحولوگيالىق كۇيدىڭ ەرەكشەلىكتەرىن ىزدەپ كورەيىك.

ءىش پىسۋدىڭ سەبەپتەرى

ادام ءوز-ءوزىن باقىلاي الماي، نازارىن ءبىر نۇكتەگە سالا الماي وتىرعان ساتتە ءىشى پىسادى. مىسالى، بويىڭىزدا كۇشىڭىز تاسىپ وتىر، ءبىراق، ءىش پىستىراتىن دارىستە وتىرسىز، ۇزىن سونار كەزەكتە تۇرسىز نەمەسە اۋەجايدىڭ كۇتۋ زالىندا ۇشاعىڭىزدى كۇتىپ وتىرسىز.

اينالاڭىزدا قىزىقتى ءارى كوڭىلىڭىزدى اربايتىن دۇنيەلەر كوپ بولسا دا، تەز ءبىتىرۋ كەرەك جۇمىسىڭىز بولسا دا، الاڭداپ كەتەسىز. ەگەر اۋەجايدا ۇشاق كۇتىپ قالساڭىز، كۇتۋ زالىندا كورسەتىلەتىن ەكراننان ۆيدەولاردى قاراۋعا بولادى، كىتاپ وقىڭىز، بىرگە جول جۇرەتىن جولاۋشىلارمەن تانىسىڭىز. اينالاڭىزدا جۇرگەن ادامدارعا قاراڭىز، ءتىپتى، ءىش پىسقاندا اينالادا جۇرگەن ادامدارعا قاراعاننىڭ ءوزى قىزىق.

1989 -جىلى زەرتتەۋشىلەر وسى تاقىرىپتا مىناداي تاجىريبە جۇرگىزگەن ەكەن. زەرتتەۋگە قاتىسۋشىلار ءبىر باسىلىمدا جازىلعان ماقالانىڭ ءۇنتاسپاداعى نۇسقاسىن تىڭداپ وتىرعان. ەكىنشى بولمەدە تەلەديداردىڭ بار داۋسىن شىعارىپ قويعان ەكەن. ال ءۇشىنشى بولمەدە وپەرا قوسىپ قويعان ەكەن. ماقالانى تىڭداپ وتىرعان ادامدار ءوزى ەلەڭ ەتكەن داۋىسقا بارىپتى، ياعني توپتاعى كەي ادامدار تەلەديدار قوسۋلى تۇرعان بولمەگە، ال ەندى بىرەۋلەرى وپەرا قوسىلعان بولمەگە بارىپتى.

ال كەيبىرى العاشقى تىڭداعان ماقالانىڭ قىزىعىنا ەنىپ كەتكەنى سونشالىق - داۋسى جاعالاسىپ تۇرعان تەلەديدارعا دا، وپەراعا دا ءمان بەرمەگەن. تىڭدالىم بىتكەن سوڭ، زەرتتەۋدىڭ قورىتىندىسىن شىعارعان. سويتسە، تەلەديدار كورىپ، اۋەن تىڭداعان ادامداردىڭ ءىشى پىسقان ەكەن. ال شۋدىڭ اسەرى تيمەگەن تىڭدارماندار جازبانى ۇيىپ تىڭداپ، قىزىقتى دەرەكتەرمەن «قورەكتەندىك» دەپ اسەرلەرىن جەتكىزگەن.

وسى تۇستا زەيىن سالۋ دەگەن ۇعىمنىڭ ءمانىن اشۋ كەرەك. قۇلاققا اسەر ەتكەن تەلەديدار مەن وپەرانىڭ داۋسى ولارعا كەدەرگى بولعان. كەيدە ءبىز توپ ىشىندە اڭگىمە ايتىپ وتىرىپ، ءبىر نۇكتەگە قاراپ ويلانىپ كەتەمىز. ەگەر سول ساتتە وزگە داۋىس نە سىرتقى كۇش اسەر ەتسە، ەلەڭ ەتە قالامىز. دەمەك، ادام ءار ساتتە ءبىر زەيىننەن اۋىتقي الادى. زەيىن اۋىتقىسا، نازار اۋادى، جاساپ وتىرعان جۇمىسىنان قاراپتان- قاراپ بەزىنەدى دە، وزگە تىرلىك ىزدەيدى، ول تابىلماسا ءىشى پىسادى.

كەيدە ادامدار وزىنە ۇنامايتىن ءىستى جاساپ جاتادى. مىسالى، وقىعىسى كەلمەيتىن كىتاپتى مۇعالىم وقۋشىعا تاپسىرما رەتىندە «وقىپ كەل» دەپ بەرەدى. ءبىراق، ەمتيحاندا كەلۋى مۇمكىن عوي دەگەن ويمەن ءىلىنىپ- سالىنىپ وقىپ شىعادى. دەمەك، ادام ءبىر نارسەگە زەيىن نە نازار سالۋ ءۇشىن مىندەت پەن ماقسات كەرەك. سوندا عانا زەيىن اۋادى.