ءانشى قۋاندىق راحىمنىڭ قايىنجۇرتى دا ايىپپۇل تولەيتىن بولدى

تۇركىستان. قازاقپارات - تۇركىستان وبلىسىندا كارانتين تالاپتارىنا بايلانىستى كۇندەلىكتى رەيد ۇيىمداستىرىلىپ، ەرەجەنى ەسكەرمەگەندەرگە جاپپاي ايىپپۇل سالىنىپ جاتىر.

وڭىردەگى تويحانا، مەيرامحانا، ءدامحانالاردا تىعىلىپ ءتۇرلى وتباسىلىق جيىندار وتكىزىپ جاتقانى انىقتالدى، دەپ حابارلايدى قازاقپارات ءتىلشىسى.

ەسترادا جۇلدىزى قۋاندىق راحىمنىڭ قايىنجۇرتى دا ايىپپۇل تولەيتىن بولدى. وتىرار اۋدانىنىڭ ءشاۋىلدىر اۋىلىندا قىز ۇزاتۋ تويى ءوتىپ، وعان ءانشىنىڭ جارىنىڭ تۋعان-تۋىستارى مەن اۋىلداستارى جينالعان.

«اتالعان اۋداندا قۇرىلعان موبيلدىك توپ وسى جايتقا قاتىستى تۇرعىنعا ق ر ا ق ب ت ك- ءنىڭ 425-بابى «حالىقتىڭ سانيتارلىق ەپيدەميولوگيالىق سالاماتتىلىعى سالاسىنداعى زاڭناما تالاپتارىن، سونداي-اق گيگيەنالىق نورماتيۆتەردى بۇزۋ» بويىنشا حاتتاما تولتىرعان. توي جاساۋشى تۇرعىنعا 83340 تەڭگە كولەمىندە ايىپپۇل سالىندى»، دەلىنگەن حابارلامادا.

وبلىستىق پ د باسپا ءسوز قىزمەتىنىڭ مالىمەتىنشە، شىمكەنت-جەتىساي تاس جولىنىڭ بويىندا ورنالاسقان مەيرامحانا يەسى تويحانادا «بەسىك توي» ءراسىمىن وتكىزگەن. سارىاعاش اۋدانىنىڭ تاعى ءبىر تۇرعىنى ءدامحانانى جالعا الىپ، قۇدا كۇتكەن. سونداي-اق موبيلدى توپ قۇركەلەس اۋىلدىق وكرۋگىندە ورنالاسقان تويحانانىڭ بىرەۋى جۇمىس ىستەپ جاتقانىن انىقتادى.

اۋدان ورتالىعىنداعى مەيرامحانالاردىڭ بىرىندە 2 تۇساۋ كەسەر وتكىزىلگەن.

ەسكە سالا كەتسەك، جەزقازعانداعى مەيرامحاناعا جۇلدىزداردى شاقىرىپ، ۇيلەنۋ تويىن جاساعان قۋاندىق راحىم ايىپپۇل تولەيدى. مەرەكەگە 70 تەن استام ادام جينالعان. ولاردىڭ اراسىندا تورەعالي تورەالى، ديدار قاميەۆ، نۇربولات ابدۋللين جانە باسقالارى بولعان.