ۇكىمەت كوروناۆيرۋستىڭ ىقتيمال تولقىنى ءۇشىن بارلىق شارالاردى جاساپ جاتىر - اسقار مامين

نۇر-سۇلتان. قازاقپارات - ۇكىمەت كوروناۆيرۋس ينفەكسياسىنىڭ جاڭا كەزەڭىنە دايىندىق ءۇشىن بارلىق قاجەتتى شارالاردى قابىلداپ جاتىر.

بۇل تۋرالى ق ر پرەمەر-ءمينيسترى اسقار مامين ايتتى، دەپ حابارلايدى قازاقپارات ءتىلشىسى.

«مەملەكەت باسشىسى پاندەميا كەزەڭىندە نەگىزگى ءدارى- دارمەك پەن مەديتسينالىق بۇيىمداردىڭ رەسپۋبليكالىق جانە وڭىرلىك تۇراقتاندىرۋ قورىن قۇرۋدى تاپسىردى. ۇكىمەت كوروناۆيرۋس ينفەكتسياسىنىڭ جاڭا كەزەڭىنە دايىندىق، مەديتسينا ۇيىمدارىن جانە حالىقتى ءدارى- دارمەكپەن قامتاماسىز ەتۋ جونىندە بارلىق قاجەتتى شارالاردى قابىلداپ جاتىر. بيىل مىندەتتى مەديتسينالىق ساقتاندىرۋ شەڭبەرىندە تەگىن دارىلىك زاتتاردىڭ تىزبەسى 3 ەسە نەمەسە 45 تەن 137 ءدارى- دارمەك تۇرلەرىنە دەيىن ۇلعايتىلدى»، - دەدى پرەمەر- مينيستر بۇگىنگى ۇكىمەت وتىرىسىندا.

ۇكىمەت باسشىسى تامىز ايىنان باستاپ ازاماتتارعا كوروناۆيرۋستان ۇيدە ەمدەلۋ ءۇشىن ءدارىنىڭ 5 ءتۇرى تەگىن بەرىلەتىنىن ەسكە سالدى. قازىرگى ۋاقىتتا جەكە قورعانىس قۇرالدارى مەن 91 ءدارى- دارمەكتەن تۇراتىن ەكى ايلىق رەسپۋبليكالىق جانە وڭىرلىك قور جاساۋ بويىنشا ناقتى جۇمىس اتقارىلدى. ءدارىحانالاردا تاپشىلىققا جول بەرمەۋ ءۇشىن س ق- فارماتسيا بولشەك ساۋدا جەلىسىن كوبەيتۋ ءۇشىن اسا قاجەتتى 33 پرەپاراتتى ساتىپ الىپ جاتىر.

«ءدارى- دارمەكتىڭ جەتكىلىكتى قورى بار. بارلىق وڭىردە ءدارى- دارمەكپەن قامتاماسىز ەتۋ ءۇشىن كولەمى 13 ميلليارد تەڭگەدەن استام ساقتاندىرۋ قورى قۇرىلدى. مەملەكەت باسشىسىنىڭ تاپسىرماسىمەن جانە ۆەدومستۆوارالىق كوميسسيانىڭ شەشىمىمەن جەرگىلىكتى بيۋدجەتتىڭ ەسەبىنەن قاجەتتى دارىلىك زاتتاردى ساتىپ الۋ ءۇشىن تۇراقتاندىرۋ قورىن قالىپتاستىرۋ ادىستەمەسى بەكىتىلدى»، - دەدى اسقار مامين.

اۆتور: ايجان سەرىكجان قىزى