وزبەكستاندا الەكساندر ماكەدونسكي سالدىرعان بەكىنىستەر تابىلدى

تاشكەنت. قازاقپارات - وزبەكستاننىڭ قاشقاداريا وبلىسى اۋماعىنداعى «وكرابوت» ماحاللياسىندا (شاعىناۋدان) الەكساندر ماكەدونسكي سالدىرعان ەجەلگى بەكىنىستەر تابىلدى، دەپ حابارلايدى قازاقپارات «Xalq so'zi» گازەتىنىڭ سايتىنا سىلتەمە جاساپ.

ءوز داۋىرىندە ورتا ازيانى جاۋلاعان ايگىلى قولباسشى الەكساندر ماكەدونسكي وزبەكستاننىڭ قازىرگى دەحكاناباد اۋدانى اۋماعىندا قىستاپ، وزىنە جانە ساربازدارىنا ارناپ گرەك ستيلىندە بەكىنىس تۇرعىزعان.

«بۇل بەكىنىس عاسىرلار بويى ءمۇجىلىپ، قازىر ونىڭ تەك كەيبىر بولىكتەرى ساقتالعان. ونىڭ قيراعان، سىنعان جەرلەرىنە كەزىندە رەسەي يمپەراتورى نيكولاي II جوندەۋ جۇمىستارىن جۇرگىزگەن»، - دەيدى رەسپۋبليكالىق رۋحانيات جانە اعارتۋ ورتالىعى دەحكاناباد اۋداندىق فيليالىنىڭ جەتەكشىسى رەنات كۋزيبويەۆ.

بەكىنىس ەجەلگى ۇلى جىبەك جولى بويىندا سالىنعان جانە سول كەزەڭدەگى ستراتەگيالىق ماڭىزعا يە مەكەن بولعان. جەرگىلىكتى تاريحشىلاردىڭ ايتۋىنشا، ەرەكشە ستيلدە تۇرعىزىلعان ساۋلەت ونەرى تولىق زەرتتەۋدى قاجەت ەتەدى.

اۆتور: ءاليحان اسقار