الداعى قىستا اۋا رايى قانداي بولادى

نۇر-سۇلتان. قازاقپارات - قازگيدرومەت الداعى قىس ايىنداعى اۋا رايىنا بولجامدى جاريالادى، دەپ حابارلايدى قازاقپارات.

2020-2021 -جىلداعى قىس وتكەن جىلعى قىستىڭ ستسەنارييى بويىنشا، ياعني جىلى جانە جاۋىن- شاشىنعا مول بولادى دەپ كۇتىلۋدە.

«وتكەن جىلدىڭ قىسىندا قازاقستان اۋماعىنا اتلانتيكا اۋداندارىنان جىلى جانە ىلعالدى اۋا ماسسالارىن اكەلەتىن باتىس تاسىمالى ءجيى جۇزەگە اسىرىلدى. جەر بەتىندەگى قاباتتا بەلسەندى تسيكلون مەن اتموسفەرالىق فرونتتاردىڭ ءجيى ءوتۋى بايقالدى، وسىعان بايلانىستى رەسپۋبليكانىڭ باسىم بولىگىندە مول جاۋىن- شاشىن جاۋدى. بۇل پروتسەسستىڭ ەڭ ۇلكەن اسەرى ەلدىڭ سولتۇستىك- شىعىسىندا جانە ورتالىعىندا بايقالدى، ءبىرقاتار تەرەڭ تسيكلوندار وتە قولايسىز اۋا- رايىن اكەلدى: بورانمەن ءجيى جانە قاتتى قار جاۋدى، ولاردىڭ ۇزاقتىعى 12-25 ساعات، كورىنۋ قاشىقتىعىنىڭ ناشارلاۋى 50 م دەيىن جەتتى، جەل 30-35 م/س دەيىن كۇشەيدى. الداعى قىستا قازاقستان اۋماعى بويىنشا تەمپەراتۋرالىق فون كليماتتىق نورمادان 1-2 °C جوعارى، تەك ەلىمىزدىڭ وڭتۇستىك، وڭتۇستىك- شىعىس، شىعىس ايماقتارىنىڭ تاۋلى جانە تاۋ بوكتەرلى اۋداندارىندا - نورما شاماسىندا كۇتىلۋدە»، - دەدى قازگيدرومەت.

سينوپتيكتەردىڭ بولجامىنشا، جەلتوقسان مەن قاڭتار ايلارىندا ەلىمىزدىڭ باسىم بولىگىندە اۋا رايى جاۋىن- شاشىندى بولادى، تەك باتىس وڭىرلەرىندە - از كۇتىلەدى، اقپان ايىندا جاۋىن- شاشىن مولشەرى ەلدىڭ باسىم بولىگىندە نورمادان كوپ، ال وڭتۇستىك- باتىس جارتىسىندا نورما شاماسىندا بولادى.

كوكتەمنىڭ باسى، اتاپ ايتقاندا ناۋرىز جىلى جانە جاۋىن- شاشىنىڭ مولشەرى از بولادى دەپ كۇتىلەدى. قازاقستان اۋماعىنىڭ باسىم بولىگىندە ورتاشا اۋا تەمپەراتۋراسى نورمادان 1-2 °C جوعارى، الماتى جانە شىعىس قازاقستان وبلىستارىنىڭ تاۋلى جانە تاۋ بوكتەرىندەگى اۋداندارىندا نورماعا جۋىق بولجانادى. جاۋىن- شاشىن مولشەرى باسىم بولىگىندە نورمادان از، قيىر سولتۇستىكتە جانە شىعىس قازاقستان مەن الماتى وبلىستارىنىڭ وڭتۇستىك- شىعىس بولىگىندە نورما شاماسىندا، شىعىس قازاقستان وبلاسىنىڭ تاۋلاردا نورمادان كوپ بولجانادى.