قازاقستاندا قۇس تۇماۋىنان قانشا قۇس قىرىلدى؟
بۇل تۋرالى ق ر اۋىل شارۋاشىلىعى ءمينيسترى ساپارحان وماروۆ ءمالىم ەتتى، دەپ حابارلايدى قازاقپارات ءتىلشىسى.
«2005-جىلدان بەرى سالاماتتى بولىپ كەلە جاتقان رەسپۋبليكادا قۇس تۇماۋى تىركەلدى. 2020-جىلعى 22- قىركۇيەكتەن 19- قازانعا دەيىنگى كەزەڭدە قۇستاردىڭ ءولىم-ءجىتىمى تىركەلدى. ونىڭ ىشىندە 7 وبلىستا جوعارى پاتوگەندى قۇس تۇماۋىنا كۇدىك نەمەسە راستالعان جاعدايلار ورىن الدى. جەكە اۋلالاردا 26,5 مىڭ قۇس، 3 قۇس فەرماسىندا 847,4 باس قىرىلدى. وسىلايشا، جوعارى پاتوگەندى قۇس تۇماۋىنان بارلىعى 873,9 مىڭ قۇس قىرىلىپ، بۇل جالپى قۇستاردىڭ 1,9 پايىزىن قۇرادى»، - دەدى مينيستر ۇكىمەت وتىرىسىندا.
قۇستاردىڭ ءولىم-ءجىتىمى باستالعان ساتتەن باستاپ مينيسترلىك جانىنان جانە وڭىرلەردە جەدەل شتاب قۇرىلدى، شتابتاردىڭ وتىرىستارى كۇندەلىكتى وتكىزىلۋدە. ينفەكتسيانىڭ ءار وشاعى كارانتينگە قويىلىپ، قۇستاردى جانە قۇس شارۋاشىلىعى ءونىمىن اكەلۋگە نەمەسە اكەتۋگە تىيىم سالىندى. ينفەكتسيا وشاعىن جويا وتىرىپ جانە دەزينفەكتسيا جۇرگىزە وتىرىپ، وقشاۋلاۋ جانە جويۋ شارالارى جۇرگىزىلىپ جاتىر.
«بۋفەرلىك ايماق قۇرۋ ءۇشىن جابايى قۇستاردىڭ ۇشىپ كەلۋ جولىندا ءۇي قۇستارىن ماجبۇرلەپ ۆاكتسينالاۋ ءۇشىن ۆەتەريناريالىق پرەپاراتتاردىڭ رەسپۋبليكالىق قورىنان 4,4 ميلليون دوزا كولەمىندە قۇس تۇماۋىنا قارسى ۆاكتسينا ءبولىندى. بۇگىندە جەتى وبلىستاعى جەكە اۋلالاردا قۇستاردىڭ ءولىم-ءجىتىمى توقتاتىلدى، 3 قۇس فەرماسىندا قۇستاردىڭ قىرىلۋى ازايدى. اۋرۋ قۇستاردى جويۋ جانە ولاردىڭ يەلەرىنە قۇنىن وتەۋ بويىنشا جۇمىستار جۇرگىزىلىپ جاتىر»، - دەدى س. وماروۆ.
ونىڭ سوزىنە قاراعاندا، ەپيزووتيالىق احۋال اۋىل شارۋاشىلىعى مينيسترلىگى مەن وبلىستار اكىمدىكتەرىنىڭ تۇراقتى باقىلاۋىندا.