قىرعىزستاننىڭ سۋ جاڭا ءبىرىنشى حانىمى تۋرالى اقپارات پايدا بولدى
ايگۇل اسانبايەۆا 47 جاستا، ول ىستىقكول وبلىسىنىڭ ءتۇپ اۋدانىندا دۇنيەگە كەلگەن. ماماندىق پەن ءبىلىمى تۋرالى ازىرگە مالىمەت جوق.
سادىر جاپاروۆ پەن ايگۇل كورشى اۋىلداردا تۇرىپ، تابيعات اياسىنداعى دەمالىستاردىڭ بىرىندە دوستارى ارقىلى كەزدەسەدى. اسانبايەۆا ەسكە العانداي، ول كەزدە ءوزى 18 جاستا، ال جاپاروۆ 23 جاستا بولعان. ولار ءۇش جىلدىق دوستىقتان كەيىن شاڭىراق كوتەرىپتى.
كەيبىر دەرەككوزدەر پرەزيدەنتتىڭ بەس بالاسى بار دەپ كورسەتسە، باسقالارىندا ءتورت پەرزەنتى بار دەلىنگەن. سۇحباتتاردىڭ بىرىندە بالالارى تۋرالى سۇراعاندا، اسانبايەۆا ولاردىڭ ءتورت بالاسى بار ەكەنىن، ءبىراق ولار سادىر جاپاروۆتىڭ ءىنىسى مەن كەلىنى جول اپاتىنان قايتىس بولعاننان كەيىن ولاردىڭ ۇلىن وزدەرىمەن الىپ كەتكەنىن اتاپ ءوتتى.
ءبىرقاتار بۇقارالىق اقپارات قۇرالدارىنىڭ حابارلاۋىنشا، اسانبايەۆا كۇيەۋىن «ساياسي قۋعىنداۋ» كەزىندە ءۇش جىل بويى بالالارىمەن بىرگە شەتەلدە تۇرعان. ولاردىڭ رەسەي مەن پولشادا تۇرعانى تۋرالى دا دەرەكتەر بار.
اسانبايەۆا ءوزىنىڭ سۇحباتتارىنىڭ بىرىندە كۇيەۋىن قىرعىز-قازاق شەكاراسىندا ۇستاۋ كەزىندە قاۋىپسىزدىك كۇشتەرى ونىمەن بىرگە ۇلى رۋستامدى دا قاماۋعا العانىن، سودان كەيىن ول التى ايعا جۋىق ۋاقىتشا تەرگەۋ اباقتىسىندا وتىرعانىن ايتتى. سول ساتتە اسانبايەۆا سول كەزدەگى ءبىرىنشى حانىم رايسا اتامبايەۆاعا ۇلىن بوساتۋ ءۇشىن كومەك سۇراپتى.
«تانىستارىم ارقىلى مەن ءبىرىنشى حانىمعا بارىپ، ودان كومەك سۇرادىم. ءبىراق ول «مۇنداي سۇراقتارمەن اينالىسپايمىن»، دەپ جاۋاپ بەردى... ەلىمىزدىڭ ءبىرىنشى حانىمى بولۋ باقىتى بارىنە بىردەي بەرىلمەيدى. بۇل قۇدايدىڭ بەلگىسى. سوندىقتان، ءبىرىنشى حانىم مەيىرىمدى ءارى اقىلدى بولۋ كەرەك»، - دەدى اسانبايەۆا.
ايتا كەتەيىك، سادىر جاپاروۆ جازاسىن وتەپ جاتقان كەزدە اسانبايەۆا ءوز پىكىرىن بۇقارالىق اقپارات قۇرالدارى ارقىلى اشىق ءبىلدىرىپ، ءارقاشان بيلىكتىڭ وزبىرلىعىنا قارسى ءىس-شارالارعا قاتىسقان.