شۋداعى ەسىرتكىگە قاتىستى قىلمىس پەن پوليتسەيلەردىڭ اتىسى: ءبىر ادام قايتىس بولدى

None
None
جامبىل وبلىسى. قازاقپارات - ءى ءى م وزىندىك قاۋىپسىزدىك دەپارتامەنتى ءوز قاتارىنداعى قىلمىستى تۇبىرىمەن جويۋ جۇمىسىن جالعاستىرۋدا.

بۇل جولى ولاردىڭ نىساناسىنا كولىكتەگى پوليتسيا دەپارتامەنتىنىڭ جامبىل وبلىسى شوقپار ستانساسىنىڭ جەلىلىك پوليتسيا ءبولىمىنىڭ قىزمەتكەرلەرى ءىلىندى، دەپ حابارلايدى قازاقپارات ءتىلشىسى Polisia.kz-كە سىلتەمە جاساپ.

جابايى قاراسورانى جيناۋ مەن ساتۋعا قاتىستى وزىندىك قاۋىپسىزدىك باسقارماسى سوتقا دەيىنگى تەرگەۋ امالىن باستادى. تەكسەرۋ شارالارى بارىسىندا ءو ق ب قىزمەتكەرلەرىنە كۇدىككە ىلىنگەن پوليتسيا قىزمەتكەرلەرىنىڭ قۇموزەك جەرىنە ءوتىپ، ەسىرتكى وسىمدىگىن زاڭسىز جيناپ، كەيىن ساتقىسى كەلەتىندەرى تۋرالى اقپارات كەلىپ تۇسكەن.

وزىندىك قاۋىپسىزدىك باسقارماسى مەن ارنايى قىزمەت ءبولىمى بۇل قىلمىستىڭ جولىن كەسۋ ءۇشىن ارنايى وپەراتسيا وتكىزدى.

كۇدىكتىلەر كەتىپ بارا جاتقان كولىكتى توقتاتۋ كەرەك بولاتىن. ول ءۇشىن قىزمەتكەرلەر شۋ-تاراز اۆتوجولىن جاپقان ەدى. الايدا وسى ۋاقىتتا جۇرگىزۋشى ءىز سۋىتىپ كەتۋ ءۇشىن ارنايى قىزمەتتەگىلەردىڭ كولىگىن ادەيى جانىشتاي سوعىپ، ونداعى ارنايى بولىمشە قىزمەتكەرىنىڭ ءبىرىن اۋىر جاراقاتتاعان.

قارۋى بار كۇدىكتىلەر قاتتى جىلدامدىقپەن وقيعا ورنىنان ءىز سۋىتىپ كەتپەك بولعان. ولاردىڭ كولىگىندە ءۇش ادام بولعان. پوليتسيا قىزمەتكەرلەرىنىڭ اسپانعا اتقان ەسكەرتۋ وعىنا قىلمىسكەرلەر توقتاماعان.

وسىدان كەيىن قۇقىق قورعاۋشىلار كولىكتى توقتاتۋ ءۇشىن قىزمەت قارۋىن پايدالاندى. اقىرى كۇدىكتىلەردىڭ ەكەۋى جاراقات العان. وسى وقيعانىڭ سالدارىنان ولاردىڭ بىرەۋى مەديتسينا مەكەمەسىندە كوز جۇمدى.

ەكىنشىسىنە ستاتسيونارلىق كومەك كورسەتىلدى. ءۇشىنشىسى ق ر قىلمىستىق-پروتسەسسۋالدىق كودەكستىڭ 128-بابىنا سايكەس ۇستالىپ، ۋاقىتشا وقشاۋلاعىشقا قامالدى.

قازىرگى ۋاقىتتا وسى ءىس بويىنشا ق ر قىلمىستىق كودەكسىنىڭ 297، 345، 362-باپتارى بويىنشا تەرگەۋ امالدارى جۇرگىزىلىپ جاتىر. تەرگەۋ مۇددەسىنە ساي بۇدان باسقا اقپارات جاريالانبايدى.

سوڭعى جاڭالىقتار