زەرتتەۋ: مۋزىكا بالانىڭ جادى مەن جانە ەستۋ قابىلەتىن دامىتادى

نۇر-سۇلتان. قازاقپارات - جاستايىنان مۋزىكامەن اينالىسقان بالانىڭ كوگنيتيۆ ويلاۋى دامىپ، ەستە ساقتاۋ قابىلەتى ارتادى. مۇنى دالەلدەۋ ءۇشىن چيلي عالىمدارى تاجىريبە جاساپتى.

نەيروبيولوگتاردىڭ زەرتتەۋى Frontiers in Neuroscience جۋرنالىندا جاريالاعان. عالىمدار 10-13 جاس ارالىعىنداعى 40 بالانى الىپ، ەكى جىلداي زەرتتەۋ جۇرگىزگەن. جيىرما بالادان ەكى توپقا ءبولىپ، ءبىرىنشى توپتىڭ وقۋشىلارىن اپتاسىنا ەكى رەت انسامبل مەن وركەسترگە قاتىستىرىپ، مۋزىكالىق اسپاپتار ۇيرەتكەن. ال ەكىنشى توپ ونداي ۇيىرمەلەرگە بارماعان.

ەكى جىلدىق باقىلاۋدان كەيىن بالالاردىڭ اقىل- قابىلەتى مەن جۇمىس جادىن ءبىلۋ ءۇشىن ارنايى تەستىلەۋ وتكىزگەن. ولارعا ابستراكتىلى، ۆيزۋال بەينەلەر كورسەتىپ، قىسقا اۋەندەر تىڭداتىپ، ەستە ساقتاۋ قابىلەتىن تەكسەرگەن.

ال بالالاردىڭ مي بەلسەندىلىگىن فۋنكتسيونالدى ماگنيتتىك- رەزونانستىق توموگرافيا ارقىلى باقىلاپ، مي رەاكتسياسى مەن ونىڭ كەرى بايلانىسىنا، ۋاقىتى مەن ناقتىلىعىنا ءمان بەرگەن.

ناتيجەسىندە ەكى توپتىڭ دا بالالارى بىردەي جاۋاپ بەرىپ، تەڭدەي رەاكتسيا بىلدىرگەنىمەن، مۋزىكامەن اينالىسقانداردىڭ ناقتى جاۋاپ بەرەتىنى، بىرنەشە دىبىس پەن بەينەنى ءبىر ۋاقىتتا وڭاي اجىراتا الاتىنى بايقالعان.

توموگرافيا مۋزىكامەن اينالىسقان بالالاردىڭ «فونولوگيالىق ىلمەك» اتتى ميدىڭ الدىڭعى جانە ورتاڭعى بولىگىندەگى ارنايى قۇرىلىمنىڭ بەلسەندىلىگى جوعارى بولاتىنىن كورسەتتى. ال ميدىڭ بۇل بولىگى دىبىس پەن بەينەنى تەز قابىلداۋ مەن سوعان سايكەس قيمىل- ارەكەتتىڭ جىلدام تۇزىلۋىنە ىقپال ەتەدى.

مۇنداي بالالار شىنايى ومىردە تەز شەشىم قابىلداي الاتىن بولادى.

كۇردەلى تاپسىرمالار مەن مىندەتتەردى شەشۋىنە كومەكتەسەتىن قۋاتتى كوگنيتيۆ ويلاۋ جۇيەسى قالىپتاسقاندىقتان، پسيحولوگيالىق جاعىنان ءتوزىمدى، شىعارماشىلىق قابىلەتى دامىعان كەلەدى. سونىڭ ارقاسىندا ءومىر ءسۇرۋ ساپاسى دا جوعارىلايدى.

عالىمداردىڭ ايتۋىنشا، مۋزىكا بالانىڭ جادى مەن ەستۋ قابىلەتىن اجەپتاۋىر جاقسارتادى. الداعى ۋاقىتتا عالىمدار جاد پەن ەستۋ قابىلەتىنىڭ قالاي ءبىر- بىرىنە اسەر ەتەتىنىن زەرتتەۋدى كوزدەپ وتىر.

massaget.kz