اقتوتى رايىمقۇلوۆا: ديماش قۇدايبەرگەن قازاقستاننىڭ ماقتانىشىنا اينالدى

نۇر- سۇلتان. قازاقپارات - مادەنيەت جانە سپورت ءمينيسترى اقتوتى رايىمقۇلوۆا ديماش قۇدايبەرگەندى قولداپ جاتقان دەمەۋشىلەردىڭ بارىنە العىسىن ايتتى، دەپ حابارلايدى قازاقپارات ءتىلشىسى.

«البەتتە ەڭ الدىمەن ءبىز ديماشتىڭ ءاربىر جەتىستىگى ءۇشىن قۋاناتىنىمىزدى ايتا كەتكىم كەلەدى. ول - قازاقستاننىڭ ازاماتى. وسىندا وقىدى، كوللەدجدى ءبىتىردى، قازاق ونەر ۋنيۆەرسيتەتىن اياقتادى. وتكەن جىلى ماگيستر ديپلومىن الدى. مەملەكەتتىك شاكىرتاقىمەن بىرگە ول «دارىن» سىيلىعى مەن «قازاقستاننىڭ ەڭبەك سىڭىرگەن قايراتكەرى» اتاعىن الدى. بۇل - قۇرمەتى جوعارى اتاق» - دەدى اقتوتى رايىمقۇلوۆا.

مينيستر ءوز سوزىندە ديماشتان ءاردايىم قىزىقتى جوبالاردى كۇتەتىنىن ءبىلدىردى.

«مادەنيەت جانە سپورت مينيسترلىگى ءوز تاراپىنان ونى قولدايدى، نۇر- سۇلتانداعى، ماسكەۋدەگى، امەريكاداعى كەشتەرىن وتكىزۋگە اتسالىستىق. قازىرگى تاڭدا وعان وتە كوپ دەمەۋشى كومەك كورسەتەتىنى ايتا كەتكىم كەلەدى. ول قىتايداعى «I am singer» بايقاۋىنىڭ جەڭىمپازى بولعاندىقتان، كەلىسىمشارتقا سايكەس جەڭىمپاز سونداعى بەلگىلى ءبىر شارالارعا قاتىسۋى كەرەك. ديماش «سلاۆيان بازارى» بايقاۋىندا جەڭگەن كەزدە دە ول سول جاقتاعى (بەلارۋس) كونتسەرتتەرگە قاتىسقان ەدى. ارينە قىتايدىڭ پروديۋسسەرلەرى ديماشپەن جۇمىس جۇرگىزۋگە اسىق. ديماش قۇدايبەرگەن قازاقستاننىڭ برەندىنە اينالا باستادى. ارينە ءبىزدىڭ مىندەتىمىز - ونى قولداۋ»، - دەدى اقتوتى رايىمقۇلوۆا.