«نۇر- سۇلتان - قاراعاندى» تراسساسىندا بەتوندى بوگەتتەر نە ءۇشىن قويىلىپ جاتىر

قازاقپارات - الەۋمەتتىك جەلىلەردە حالىقتى دۇرلىكتىرگەن ۆيدەوعا قاتىستى قاراعاندى وبلىسىنىڭ اكىمدىگى تۇسىنىك بەردى، دەپ حابارلايدى قازاقپارات ءتىلشىسى.

الەۋمەتتىك جەلىلەردە پايدالانۋشىلار نۇر- سۇلتان - قاراعاندى قالالارى اراسىنداعى تراسسادا قويىلعان بەتون بوگەتتەرگە قاتىستى ۆيدەونى قىزۋ تالقىلاۋدا. حالىق بۇل بلوكتار قاراعاندى وبلىسىندا قايتادان قاتاڭ كارانتيندىك شەكتەۋلەر بولاتىنىن ايتىپ، بولجام جاساۋدا. الايدا، وبلىس اكىمدىگىنىڭ باسپا ءسوز قىزمەتى بۇل قاۋەسەتتى جوققا شىعاردى.

«19-قازاننان باستاپ ءوڭىر بويىنشا سانيتارلىق بەكەتتەر جۇمىس ىستەي باستادى. ولاردىڭ جالپى سانى - سەگىز. اتالمىش بەكەتتەردە دارىگەرلەر مەن پوليتسيا قىزمەتكەرلەرى جۇمىس ىستەيدى. تەكسەرۋ بارىسىندا ساۋالناما جۇرگىزىلىپ، تەرمومەتريا جۇزەگە اسىرىلادى. بۇل - بلوكپوستار ەمەس»، - دەپ ءتۇسىندىردى قاراعاندى وبلىسىنىڭ اكىمدىگىندە.

ەسكە سالساق، سانيتارلىق بەكەتتەر جەزقازعان، پريوزەرسك، ۇلىتاۋ، نۇرا، بۇقار جىراۋ، قارقارالى، وساكاروۆ اۋداندارىندا ورناتىلدى. قازىرگى ۋاقىتتا وبلىستىڭ كارانتينگە جابىلۋى تۋرالى اقپارات جوق. ەگەر جۇرگىزۋشى مەن جولاۋشىلاردىڭ دەنى ساۋ بولسا، سانيتارلىق بەكەتتەر جول جۇرۋگە كەدەرگى ەتپەيدى.