ەلەۋلى ناتيجە بولماسا دا قاراجاتتىڭ كوبى فۋتبول جانە حوككەي كلۋبتارىنا جۇمسالۋدا - مينيستر

نۇر-سۇلتان. قازاقپارات - مادەنيەت جانە سپورت ءمينيسترى اقتوتى رايىمقۇلوۆا سپورت كلۋبتارىنىڭ قاراجاتىن قايتا ءبولۋدىڭ ءبىرىڭعاي تاسىلدەرى ەنگىزىلەتىنىن ءمالىم ەتتى، دەپ حابارلايدى قازاقپارات ءتىلشىسى.

«ماسەلەن 2019-2020 -جىلدارى ەلىمىزدىڭ 17 وڭىرىندە جەرگىلىكتى بيۋدجەتتەردەن 252,6 ميلليارد تەڭگە ءبولىنىپ، ەلەۋلى ناتيجەلەردىڭ بولماۋىنا قاراماستان قاراجاتتىڭ كوپ بولىگى فۋتبول جانە حوككەي كلۋبتارىن ۇستاۋعا جۇمساۋ جالعاسۋدا. وسىلايشا، 2019 -جىلى جالپى 121,3 ميلليارد تەڭگە ءبولىنىپ، ونىڭ ىشىندە فۋتبولعا 34,1 ميلليارد تەڭگە (%28,1)، ال 2020 -جىلى 131,3 ميلليارد تەڭگە ءبولىنىپ، ونىڭ ىشىندە فۋتبولعا - 37 ميلليارد تەڭگە (%28,2) جۇمسالدى. ءوز كەزەگىندە مادەنيەت جانە سپورت مينيسترلىگى بارلىق رەسپۋبليكالىق ويىن فەدەراتسيالارىمەن (فۋتبول، حوككەي، گاندبول، ۆولەيبول، باسكەتبول، رەگبي، كوگالداعى حوككەي جانە ت. ب. ) كەڭەس وتكىزدى. كەڭەس بارىسىندا جوعارىدا اتالعان كلۋبتاردىڭ قاراجاتىن قايتا ءبولۋدىڭ ءبىرىڭعاي تاسىلدەرى تالقىلاندى. كلۋبتار سپورتشىلاردى ۇستاۋعا ءوز بيۋدجەتىنىڭ %50 نا دەيىن قاراجات جۇمسايتىندىقتان فەدەراتسيادان سپورتشىلاردىڭ جالاقىسىن رەتتەۋ بويىنشا ۇسىنىستار كەلىپ ءتۇستى»، - دەدى اقتوتى رايىمقۇلوۆا و ك ق-دا وتكەن باسپا ءسوز ءماسليحاتىندا.

ءمينيستردىڭ ايتۋىنشا 5-قازاننان باستاپ مادەنيەت جانە سپورت مينيسترلىگى كاسىپتىك سپورت كلۋبتارىن ۇستاۋعا باعىتتالاتىن قارجىنى قايتا قاراۋ ماسەلەسى بويىنشا جەرگىلىكتى اتقارۋشى ورگاندارمەن تىڭداۋ وتكىزىلۋدە.

«بۇگىنگى كۇنى مينيسترلىك سپورتشىلارعا، جاتتىقتىرۋشىلارعا جانە كلۋب جەتەكشىلەرىنە جالاقى تولەمدەرىن زاڭدى دەڭگەيدە رەتتەۋ بولىگى بويىنشا ماجىلىستە قارالۋدا جاتقان زاڭ جوباسىنا تۇزەتۋلەر ازىرلەدى. بۇل ماسەلە ق ر ءماجىلىسىنىڭ جۇمىس توبىنىڭ وتىرىسىندا قارالىپ، دەپۋتاتتار تاراپىنان قولداۋ تاپتى. بالالاردىڭ سپورتتىق جانە شىعارماشىلىق الەۋەتىن دامىتۋ ءۇشىن جاعداي جاساۋ ماقساتىندا بارلىق وبلىستا، رەسپۋبليكالىق ماڭىزى بار قالادا جانە استانادا، ءىرى اۋدان ورتالىقتارىندا سپورت سەكتسيالارىن اشۋ جانە «بالالار ۇيىرمەلەرىنىڭ» قىزمەتىن قالپىنا كەلتىرۋ بويىنشا جۇمىس جۇرگىزىلۋدە»، - دەدى ول.