08:22, 19 - قازان 2020 | GMT +6
رەفورمالار جونىندەگى جوعارى كەڭەستىڭ العاشقى وتىرىسى قاشان وتەدى
نۇر- سۇلتان. قازاقپارات - مەملەكەت باسشىسى قاسىم- جومارت توقايەۆ رەفورمالار جونىندەگى جوعارى كەڭەستىڭ العاشقى وتىرىسى 21 - قازاندا وتەتىنىن ايتتى، دەپ حابارلايدى قازاقپارات.
«كەڭەسشىم، رەفورمالار جونىندەگى جوعارى كەڭەس ءتوراعاسىنىڭ ورىنباسارى سەر سۋما چاكرابارتيمەن كەزدەسۋ بارىسىندا بيىلعى 21 - قازاندا وتەتىن كەڭەستىڭ العاشقى وتىرىسىنىڭ كۇن ءتارتىبىن تالقىلادىق. نەگىزگى رەفورمالار ايقىندالدى، ولاردى پىسىقتاۋ جۋىق ارادا باستالۋى كەرەك» دەپ جازدى قازاقستان پرەزيدەنتى Twitter پاراقشاسىندا.
ەسكە سالا كەتەيىك، ءبىز وسىعان دەيىن پرەزيدەنت جانىنان رەفورمالار جونىندەگى جوعارى كەڭەس قۇرىلعانىن حابارلاعان بولاتىنبىز. بۇل كەڭەس مەملەكەتتىك ورگانداردىڭ باستاماسىمەن رەفورمالار جونىندەگى اسا ماڭىزدى ۇسىنىستاردى قاراۋ جانە بەكىتۋمەن اينالىسادى. ونىڭ جۇمىسىنىڭ تيىمدىلىگىن ارتتىرۋ ماقساتىندا كەڭەس قۇرامىنا ەۋروپالىق قايتا قۇرۋ جانە دامۋ بانكىنىڭ ەكس- پرەزيدەنتى سۋما چاكرابارتي ەنگىزىلگەن.