پسيحولوگ: پاندەميا وتەدى، قالىپتى ومىرگە قايتا ورالامىز - وسىنى ەستەن شىعارمايىق

None
None
الماتى. قازاقپارات - ساراپشىلاردىڭ ايتۋىنشا، قازاقستان COVID-19 ۆيرۋسىنا الاڭداۋشىلىق يندەكسى بويىنشا ت م د ەلدەرى اراسىندا ەڭ تومەنگى كورسەتكىشكە يە.

بىزدە ادامدار ۆيرۋس تۋرالى كوپ وقىمايتىن كورىنەدى. ءتىپتى، از ايتىپ، از تىڭدايدى ەكەن. پسيحولوگتار مۇنى پسيحيكالىق سارقىلۋ دەپ اتايدى. بۇل جاقسى ما، جامان با، ەكىنشى تولقىن باستالعانعا دەيىن ءبىز ءوز رەسۋرستارىمىزدى قالاي قالپىنا كەلتىرە الامىز، مۇنى جاساۋ قاجەت پە، جوق پا - ونى بىزگە الماتى جەدەل شۇعىل كومەك كورسەتۋ اۋرۋحاناسىنىڭ پسيحولوگى گۇلنار دوسجانوۆا ايتىپ بەردى.

- قازىر حالىقتىڭ اۋرۋ الدىنداعى ۇرەيى باسەندەگەن سياقتى ما؟

- ادامدار قازىر باستان كەشىپ وتىرعان جاعداي - اپاتيا مەن اشۋدىڭ قوسپاسى. كوروناۆيرۋس تاقىرىبى اڭگىمەدەن بىرتىندەپ جوعالىپ بارادى. قاۋىپ ۇيرەنشىكتى جاعدايعا اينالعانداي، ەندى وعان ءمان بەرەتىندەي كۇش تە قالمادى. شىندىعىندا، ۇزاققا سوزىلعان كۇيزەلىس ادامدى قاجىتادى. كوپ ادام پسيحولوگيالىق تۇرعىدان كۇيىپ كەتەدى، سوندىقتان اپاتيا تۋىندايدى. ءبىز «مۇنىڭ ءبارى قاشان اياقتالادى؟» دەگەن سۇراقتى ءجيى قويامىز. بۇل - قالىپتى پروتسەسس، ەڭ باستىسى قورىقپاۋ جانە ۇرەيلەنبەۋ كەرەك. مەنىڭ ويىمشا، پاندەميانىڭ ءبىرىنشى تولقىنىنداعى قيىن جاعداي ەندى قايتالانبايدى. ول كەزدە بۇعان ەكونوميكا تۇرعىسىنان دا، مەديتسينا تۇرعىسىنان دايىن ەمەس ەدىك. قازىر بىزدە تاجىريبە بار، ياعني ەكىنشى تولقىن وڭاي ءوتۋى كەرەك.

- وسىنىڭ بارىنە توزۋگە ادامداردا ءالى دە پسيحولوگيالىق رەسۋرس بار ما؟ ونى قالاي قالپىنا كەلتىرۋگە بولادى؟

- كوروناۆيرۋس قورقىنىشىن تولىعىمەن جەڭۋ وڭاي شارۋا ەمەس. مەنىڭ ويىمشا، ونىڭ قاجەتى دە جوق. ويتكەنى بۇل تۇرعىنداردىڭ كارانتين شارالارىنا نەمقۇرايلى قاراپ، سانيتارلىق تالاپتاردى ساقتاماۋىنا اكەپ سوعۋى مۇمكىن. ءدال قازىرگى ۋاقىتتا وعان جول بەرۋگە بولمايدى. قاۋىپ ءالى سەيىلگەن جوق. اۋرۋ جۇقتىرۋ قاۋىپى ءالى دە جوعارى. ءبىز سابىر ساقتاپ، سانيتارلىق تالاپاردى بۇلجىتپاي ورىنداۋىمىز كەرەك. ساۋلىق - ساقتىقتا. وسىنى ەستەن شىعارماعان ابزال. قازىرگى جاعدايدا ينفەكسيادان قورقۋ قالىپتى جاعداي، سوندىقتان ونىمەن كۇرەسۋدىڭ ءمانى جوق. ەڭ باستىسى - ونىڭ فوبياعا اينالۋىنا جول بەرمەۋ.

- ءسىز اۋرۋحانادا «قاۋىپتى ايماقتا» جۇمىس ىستەدىڭىز، ناۋقاستار قانداي ماسەلەمەن ءجيى جۇگىنۋشى ەدى؟

- مەن 3 ايعا جۋىق «قىزىل ايماقتا» كوۆيدتى ناۋقاستارمەن جۇمىس ىستەدىم. ناۋقاستاردىڭ باسىم بولىگى بويلارىن مازاسىزدىق، ۇرەي مەن ءولىم قورقىنىشى بيلەپ العانىن ايتىپ شاعىمداندى. ولاردا وزدەرىن باسقارا الماۋ جانە دارمەنسىزدىك سەزىمدەرى بولدى، تىنىس الۋدا قيىندىقتار بولدى جانە بۇل ولار ءۇشىن وتە قورقىنىشتى بولدى. مەن ولارمەن ۇنەمى اڭگىمە جۇرگىزدىم، ءتۇرلى كەڭەستەر بەردىم، قورقىنىش، ۇرەي دەڭگەيىن تومەندەتۋ ءۇشىن پسيحوكوررەكسيالىق جۇمىستار جۇرگىزدىم، سۋيتسيدتىك مىنەز- قۇلىق قاۋپىن جويدىم. جاسىراتىنى جوق، ونداي ناۋقاستار بولدى.

- كوۆيد شىنىمەن جۇيكەگە اسەر ەتە مە؟

- يا، وكىنىشكە قاراي كوۆيد ادامداردىڭ پسيحيكاسىنا اسەر ەتتى. اسىرەسە، ينفەكسيانىڭ اۋىر تۇرىنە شالدىققانداردا ايقىن بايقالدى. مازاسىزدىق، دەپرەسسيا، كۇيزەلىس، ءتىپتى سۋيتسيد ينفەكسيانىڭ جاڭا «جاناما اسەرلەرىنە» اينالدى. سونىمەن قاتار، جارالى جۇرەك سيندرومى نەمەسە سترەسستىك كارديوميوپاتيا دەپ اتالاتىن سيرەك كەزدەسەتىن جاعدايدىڭ تانىمالدىعى ارتىپ كەلەدى. سيندروم سول جاق قارىنشانىڭ الدىڭعى قابىرعاسىنىڭ ميوكارد ينفاركتىسىنە ءتان ەكگ- نىڭ وزگەرۋىمەن قاتار جۇرەتىن جۇرەك جەتكىلىكسىزدىگىنىڭ نەمەسە كەۋدە قۋىسىنىڭ اۋىرسىنۋىمەن كورىنەدى.

- نەلىكتەن وقشاۋلاۋ مەن كارانتين كوپشىلىك ءۇشىن مورالدىق تۇرعىدا وتە قيىن بولدى؟

- 2020 -جىل - بەلگىسىزدىك پەن ۇلكەن الاڭداۋشىلىق جىلى بولدى. ناۋرىز ايىنىڭ سوڭىندا بۇكىل الەمدە العاش رەت ءوزىن-ءوزى وقشاۋلاۋ رەجيمى ەنگىزىلدى. 3 ايعا جۋىق ۋاقىت ءبىزدىڭ ادەتتەگى ءومىرىمىز توقتاپ قالدى، جۇمىس پەن وقۋ ونلاين رەجيمىنە اۋىستىرىلدى. ءبىز ءوزىمىزدى كوروناۆيرۋستان قۇتقارۋ ءۇشىن وقشاۋلاندىق، ءبىراق ءوزىمىزدى وزىمىزدەن قۇتقارا الدىق پا؟ وقشاۋلانۋ كوپ ادامنىڭ ءتوزىمىن تاۋىستى. سوندىقتان ادامدار دەپرەسسياعا ۇشىرادى. پارانويا دەڭگەيى جوعارىلاپ، ويلاۋ قابىلەتى تومەندەدى. وقشاۋلاۋ بىزگە وسىلاي اسەر ەتتى. سەبەبى، ءا دەگەندە بولىپ جاتقان وقيعالار تۇسىنىكسىز بولدى. ءارتۇرلى دەرەككوزدەن تۇسىنىكسىز اقپاراتتار تارادى. مىنە، وسىنىڭ ءبارى ادامعا جاعىمسىز اسەر اكەلدى.

- ءسىز پراكتيكالىق پسيحولوگ رەتىندە پاندەميا كەزىندە ادامدارعا قانداي كەڭەس بەرەر ەدىڭىز؟

- ۇرەيگە بوي الدىرماۋ. اقپارات كوزدەرىن باقىلاۋ جانە ونىڭ ءسىزدىڭ جاعدايىڭىزعا اسەر ەتۋىنە جول بەرمەۋ كەرەك. اقپاراتتىڭ پايدالى تۇستارىن عانا الۋ كەرەك. ەڭ باستىسى مىنانى ۇمىتپاڭىز، پاندەميا وتەدى، قالىپتى ءومىرىمىز قايتىپ ورالادى. قاۋىپسىزدىك شارالارىن ۇستانساق، ءبارى جاقسى بولادى.

- سۇحباتىڭىزعا راحمەت!

اۆتور: الما مۇقانوۆا

سوڭعى جاڭالىقتار