قازاق دارىگەرى موڭعوليانىڭ ەڭبەك ەرى اتاندى - شەتەلدەگى قازاق ءتىلدى ب ا ق- قا شولۋ

نۇر-سۇلتان. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

ەسەي نىعمەت ۇلىنا موڭعوليانىڭ «ەڭبەك ەرى» اتاعى بەرىلدى – KAZNEWS

موڭعوليا پرەزيدەنتى حالتمااگين باتتۋلگانىڭ جارلىعى بويىنشا جەرگىلىكتى تۇرعىنداردىڭ دەنساۋلىعىن قورعاۋ، دارىگەرلەردىڭ بىلىكتىلىگىن ارتتىرۋ جانە حيرۋرگيالىق جاڭا تاسىلدەردى ەنگىزۋ باعىتىندا ۇزاق جىلدار ابىرويلى قىزمەت اتقارعان بايان- ولگەي ايماعىنىڭ بىرىككەن اۋرۋحاناسىنىڭ اعا دارىگەرى نىعمەت ۇلى ەسەيگە موڭعوليانىڭ «ەڭبەك ەرى» اتاعى بەرىلدى»، - دەپ جازادى موڭعوليالىق اقپارات پورتالى.

التاي ايماعىندا قازاقتىڭ ۇلتتىق ەرەكشەلىگىن كورسەتكەن مادەني-تانىمدىق شارا ءوتتى - اعاجاي- التاي

قىتايدىڭ التاي ايماعىندا قازاقتىڭ ۇلتتىق ەرەكشەلىگىن، مادەنيەتىن، سالت- ءداستۇرىن كورسەتكەن مادەني- تانىمدىق تۋريزم شاراسى ءوتتى، دەپ حابارلايدى kazakh.altxw.com سايتى.

اتالعان اقپارات كوزىنىڭ جازۋىنشا، التاي ايماعىنڭ بۋرىلتوعاي اۋدانىندا وتكەن ءىس-شارادا كورەرمەندەرگە ۇلتتىق سالت-داستۇرلەر ارقاۋ ەتىلگەن تەاترلاندىرىلعان قويىلىمدار، اقىندار ايتىسى، حالىق اندەرى مەن بيلەرى كورسەتىلگەن. سونىمەن بىرگە الامان بايگە، جورعا جارىسى، تەڭگە ءىلۋ سەكىلدى ۇلتتىق سپورت تۇرلەرى دە ۇيىمداستىرىلعان.

سونداي-اق، التاي قويلارىنىڭ ماۋسىمدىق كوشى- قون كەزىندەگى قونىس اۋدارۋى تاماشالانىپ، مىڭداعان قويلار كورەرمەن الدىنان شۇبىرىپ وتكەن. اتالعان شارادا وسى اسىل تۇقىمدى التاي قويىنىڭ اتالىعى، 163,3 كيلوگرامدىق قوشقار اۋكسيونعا شىعارىلىپ، 68 مىڭ يۋانعا ساتىلعان. الىس-جۋىقتان كەلگەن تۋريستەرگە بۋرىلتوعاي اۋدانىنىڭ «ۇلىڭگىر كولى» سەكىلدى كورىكتى جەرلەرى ناسيحاتتالىپ، تانىستىرىلعان.

قازاقستان مەن تۇركيا عارىش سالاسىندا ارىپتەستىك ورناتادى - TRT

قازعارىش پەن تۇرىك عارىش اگەنتتىگى عارىش سالاسىنداعى ەكىجاقتى ىنتىماقتاستىققا باعىتتالعان ءوزارا تۇسىنىستىك تۋرالى مەموراندۋمعا قول قويدى، دەپ جازادى تۇركيا راديو تەلەۆيزيا پورتالى. «تۇركيا عارىش اگەنتتىگى ءتوراعاسى سەردار حۇسەيىن يىلدىرىم قازاقستانعا ەكى كۇندىك ساپارمەن بارىپ، ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسينمەن كەزدەستى. قازاقستان ساپارى شەڭبەرىندە، تۇرىك دەلەگاتسياسى نۇر-سۇلتان قالاسىنداعى ۇلتتىق عارىش ورتالىعىن ارالاپ، جەردى قاشىقتىقتان زوندتايتىن قازاقستاندىق سپۋتنيكتەردىڭ جۇمىسىمەن تانىستى. سونداي-اق، تۇرىك عارىش اگەنتتىگى دەلەگاتسياسىنىڭ مۇشەلەرى قىزىلوردا وبلىسىنداعى بايقوڭىر عارىش ايلاعىنا بارىپ، Soyuz MS-17 عارىش كەمەسىنىڭ ۇشىرىلۋىن تاماشالادى.

ساپار بارىسىندا يىلدىرىم قازاقستان اەروعارىش كوميتەتىنىڭ ءتوراعاسى باۋبەك ورالماعامبەتوۆپەن كەزدەسىپ، عارىش سالاسىنداعى ەكىجاقتى ىنتىماقتاستىققا باعىتتالعان ءوزارا تۇسىنىستىك تۋرالى مەموراندۋمعا قول قويدى»، - دەپ جازادى TRT.

«جىبەك جولى» حالىقارالىق تۋريزم ۋنيۆەرسيتەتى اشىلدى – ءوز ا

وزبەكستاننىڭ سامارقاند قالاسىندا «جىبەك جولى» حالىقارالىق تۋريزم ۋنيۆەرسيتەتىنىڭ رەسمي اشىلۋ سالتاناتى شاراسى ءوتتى، دەپ جازادى وزبەكستاننىڭ «ءوز ا» مەملەكەتتىك اقپارات اگەنتتىگى. «اتاۋلى ۋنيۆەرسيتەت مەملەكەت باسشىسىنىڭ 2018 -جىلعى 28-ماۋسىمداعى جارلىعىمەن قۇرىلعان جانە تۋريزم سالاسىنداعى ورتالىق ازياداعى العاشقى ۋنيۆەرسيتەت بولىپ تابىلادى. ءبىلىم ورداسىنىڭ اشىلۋ سالتاناتىنا وزبەكستان رەسپۋبليكاسى پرەمەر- ءمينيسترىنىڭ ورىنباسارى، ءتۋريزمدى دامىتۋ جونىندەگى مەملەكەتتىك كوميتەتتىڭ ءتوراعاسى ا. ابدۋحاكيموۆ، سامارقاند وبلىسىنىڭ اكىمى ە. تۋرديموۆ قاتىستى»، - دەپ جازادى «ءوز ا».

يراننىڭ ەۋرازيا ەكونوميكالىق وداعىنا ەكسپورتى 6 پايىزعا ءوستى - «فارس» اقپارات اگەنتتىگى

يراننىڭ ساۋدا جانە دامۋ ۇيىمى يران ەلىنىڭ ەۋرازيا ەكونوميكالىق وداعىنا ەكسپورتىنىڭ 6 پايىزعا وسكەنىن حابارلادى، دەپ جازادى «فارس» اقپارات اگەنتتىگى.

«يران ساۋدا جانە دامۋ ۇيىمىنىڭ مالىمەتىنە سايكەس، ەكسپورتتىق تاۋارلاردىڭ باسىم بولىگى رەسەيگە، از بولىگى بەلارۋسقا جىبەرىلدى. سونىمەن قاتار، بۇل ەسەپتە يرانعا رەسەيدەن ەڭ كوپ جانە قىرعىزستاننان ەڭ از تاۋار يمپورتتالعان. يران كەدەن باسقارماسىنىڭ ستاتيستيكالىق مالىمەتتەرىنە سايكەس، يراننىڭ سوڭعى بەس ايدا ەۋرازيا ەكونوميكالىق وداعىنا مۇشە 5 ەلمەن سىرتقى ساۋدا كولەمى 2 ميلليارد دوللاردان استى. بۇل كورسەتكىش وتكەن جىلدىڭ وسىنداي مەرزىمىمەن سالىستىرعاندا 6 پايىزعا ءوستى»، - دەلىنگەن Рarstoday پورتالىندا.

اۆتور: باقىتجول كاكەش